Qazaqstan álemdik zııatkerlik báseke alańyna aınalyp keledi – Juldyz Súıleımenova
ASTANA. KAZINFORM – Qazaqstandyq oqýshylardyń halyqaralyq olımpıadalardaǵy jetistigi eldegi bilimge salynǵan ınvestıtsııanyń naqty nátıjesin kórsetip otyr. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda aıtty.
Mınıstr keshe halyqaralyq olımpıadalardyń jeńimpazdary men júldegerlerin búkil el bolyp qýanyshpen qarsy alǵanyn atap ótti. Olardyń jetistigi Memleket basshysynyń joǵary baǵasyna ıe boldy. Bıyl alǵash ret oqýshylarmen birge olardyń muǵalimderi men jattyqtyrýshylary da osyndaı joǵary deńgeıde marapattaldy.
– Bul elimizde balanyń jetistigi baǵalanatynyn jáne muǵalimniń eńbegi qurmetke bólenetinin kórsetedi. Al osy qoldaýdyń artynda balalarymyzdyń naqty nátıjeleri tur, – dedi mınıstr.
2026 jyly Qazaqstannyń fızıkadan ulttyq quramasy tarıhı nátıjege qol jetkizdi. Fızıkadan ótken 56-shy halyqaralyq olımpıadada qazaqstandyq bes oqýshynyń barlyǵy altyn medal ıelendi. Bul – Qazaqstannyń osy olımpıadaǵa qatysý tarıhyndaǵy eń úzdik nátıje.
Qazaqstandyq oqýshylardyń tehnologııa salasyndaǵy jetistikteri de artyp keledi. Álemdik robototehnıka chempıonatynda qazaqstandyq oqýshylar 12 júldege ıe bolyp, eldiń ınjenerııa men tsıfrlyq tehnologııalar baǵytyndaǵy áleýetin taǵy bir márte kórsetti.
– Qazaqstan álemdik zııatkerlik básekeniń alańyna aınalyp keledi. Bıyl alǵash ret Astanada 106 elden 500-ge jýyq qatysýshy jınalǵan JI boıynsha halyqaralyq olımpıada ótti. Qazaqstandyq oqýshy jalpy esepte ekinshi oryn aldy, – dedi Juldyz Súleımenova.
Mınıstr bul nátıjeler bilim salasyna kórsetilip otyrǵan júıeli qoldaýdyń arqasynda múmkin bolǵanyn atap ótti.
– Qol jetkizgen nátıjeler Sizdiń bilim salasyna kórsetip otyrǵan júıeli qoldaýyńyzdyń jáne olımpıadalyq qozǵalysqa erekshe kóńil bólýińizdiń arqasynda múmkin boldy. Sizdiń tapsyrmańyzben daryndy jastardy odan ári damytý múmkindikteri keńeıtildi. Onyń ishinde «Bolashaq» stıpendııasy arqyly bilim alý múmkindigi de bar. Búginde oqýshylarymyz álemniń jetekshi alańdarynda joǵary básekege qabiletti ekenin dáleldedi. Endigi mindet – bilim berýdiń joǵary sapasyn árbir mektep pen árbir balaǵa qoljetimdi etý, – dedi ol Memleket basshysyna.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
Elimizde aýyl men qala oqýshylary arasyndaǵy bilim alshaqtyǵy 5 balǵa qysqarǵan.
