Qazaqstan álemdik kúnbaǵys maıy eksportynda 8-orynǵa ıe boldy
ASTANA. KAZINFORM – Qazaqstan álemdik kúnbaǵys maıy eksportynda 8-orynǵa ıe boldy. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.
- Kelesi mańyzdy qadam – qaıta óńdeý. Osy baǵytta maı óńdeý zaýyttarynyń qýatyn keńeıtý jáne tehnologııalyq jańǵyrtý boıynsha júıeli jumys júrgizilýde. 2024–2025 jyldary 58 mlrd teńgege jalpy qýaty shamamen 1 mln tonna bolatyn 4 iri joba iske qosyldy. Sondaı-aq Shyǵys Qazaqstan oblysynda ınnovatsııalyq ónim — letsıtın óndirý boıynsha óndiristik jeli paıdalanýǵa berildi, - dedi mınıstr.
Onyń málimetinshe, Soltústik Qazaqstan oblysynda da bıyl letsıtın óndirý zaýyty iske qosylatyn bolady.
- Sonymen qatar aldaǵy úsh jylda 94 mlrd teńgege 13 jobany júzege asyrý josparlanýda. Osy sharalardyń arqasynda kúnbaǵys maıynyń eksporty 600 myń tonnaǵa deıin jetip, Qazaqstan álemdik maı eksportynda 8-orynǵa ıe boldy, - dedi Aıdarbek Saparov.
Aıta keteıik, buǵan deıin ol maıly daqyldar ósimdik sharýashylyǵynyń tabystylyq draıverine aınalǵanyn aıtqan edi.