Qazaqstan álemdik ekonomıkanyń úzdik 50 eli qataryna endi

ASTANA. KAZINFORM — Álemdegi eń iri 50 ekonomıkanyń JІÓ derekteri men 2000 jyldan 2025 jylǵa deıingi kezeńdegi ortasha jyldyq naqty JІÓ ósý qarqynyna sáıkes, Qazaqstan Ortalyq Azııadaǵy eń iri 50 ekonomıkanyń qataryna kirgen jalǵyz el boldy. 

Budan basqa, Qazaqstan ortasha jyldyq naqty JІÓ ósimi boıynsha alǵashqy bes eldiń qataryna kirdi.

Bul týraly 5 qańtarda Visual Capitalist portaly jarııalaǵan HVQ derekteri dálel keltirip otyr.

Ekonomıkasy 30,6 trln dollarǵa baǵalanǵan Qurama Shtattar daýsyz álemdik ekonomıkalyq alyp el bolyp qaldy jáne bul kóshbasshylyqty aldaǵy kóptegen jyl boıy saqtaıdy dep kútilip otyr.

Eń iri bes ekonomıkanyń qataryna sondaı-aq Qytaı, Germanııa, Japonııa jáne Úndistan kirdi.

AQSh-tyń ústemdigine qaramastan, kóptegen el, sonyń ishinde Qazaqstan, ósý qarqyny men damý dınamıkasy boıynsha odan asyp tústi. Sońǵy 25 jylda Qurama Shtattardyń naqty JІÓ-niń ortasha jyldyq ósý qarqyny 2,1% boldy. Osy arada Qytaı 2000 jyldan beri jylyna orta eseppen 8%-dyq naqty JІÓ ósimin kórsetti.

2000-2025 jyldar aralyǵyndaǵy kezeńniń qorytyndylary boıynsha Qazaqstan Qytaı, Úndistan, Vetnam jáne Bangladeshpen birge 5,6% bolǵan naqty JІÓ-niń ortasha jyldyq ósý qarqyny boıynsha alǵashqy bes eldiń qataryna endi. 

Aıta ketelik Prezıdent jasandy ıntellekt JІÓ-ge 20 mlrd dollar qosýy múmkin ekenin aıtqan edi.