Qazaqstan álemdik ekonomıkadaǵy ornyn nyǵaıta tústi – halyqaralyq sarapshy
ASTANA. KAZINFORM – Qazaqstan álemdik ekonomıkalyq keńistiktegi bedelin aıtarlyqtaı nyǵaıtyp keledi. Halyqaralyq saraptamalar qorytyndysy boıynsha, elimiz satyp alý qabiletiniń tepe-teńdigine negizdelgen JІÓ kólemi boıynsha 36-orynǵa turaqtady. Bul kórsetkish elimizdegi makroekonomıkalyq serpin men sońǵy jyldary júzege asqan júıeli ózgeristerdiń aıqyn kórinisi bolmaq.
Halyqaralyq qatynastar jáne strategııalyq kommýnıkatsııalar salasynyń mamany, Eýrazııa geosaıasatyn zertteýshi, Daffodıl halyqaralyq ýnıversıtetiniń (Dakka, Bangladesh) professory Greg Saımons atalǵan úderiske oń baǵasyn berdi.
Onyń paıymdaýynsha, Qazaqstannyń táýelsizdik alǵan qysqa ýaqyt ishindegi qol jetkizgen jetistikteri eldiń aıtarlyqtaı alǵa jyljýynyń aıǵaǵy. Sonymen qatar sarapshy aldaǵy damý kezeńinde osy deńgeıdi saqtap qalý úshin salmaqty ári júıeli ekonomıkalyq saıasat júrgizýdiń mańyzdylyǵyn atap ótti.
– Mundaı nátıjeni saqtap qalý úshin utymdy basqarý jáne elimizdiń halyqaralyq ekonomıkalyq úderisterindegi óz rólin derbes aıqyndaı alý qabiletine tikeleı baılanysty, – dedi Greg Saımons.
Sarapshy Qazaqstannyń álemdegi eń iri 40 ekonomıkanyń qataryna qosylýyn ishki reformalar men jahandyq faktorlardyń utymdy ushtasýynan kóredi. Bul rette memlekettik ekonomıkalyq saıasat aıasynda qabyldanǵan sheshimder men syrtqy ahýalǵa beıimdele bilý qasıeti sheshýshi ról atqarǵan.
Greg Saımons Ortalyq Azııanyń geoekonomıkalyq mańyzy artyp kele jatqanyna da erekshe toqtaldy.
Onyń paıymdaýynsha, Qazaqstan óziniń tabıǵı resýrs áleýeti men tıimdi geografııalyq ornalasýynyń arqasynda óńirde ǵana emes, halyqaralyq arenada da pozıtsııasyn nyǵaıtýǵa qaýqarly.
– Qazaqstan aımaq elderimen ózara tıimdilik pen seriktestikke negizdelgen yntymaqtastyqty damytqan jaǵdaıda ǵana óńirdegi tartylys ortalyǵyna aınala alady, – dep túıindedi sarapshy.
El ishindegi ózgeristerge toqtalǵan Greg Saımons sońǵy jeti jylda Qazaqstanda keshendi damý úderisi júrip jatqanyn, oǵan ekonomıkalyq qana emes, ınstıtýtsıonaldyq, saıası jáne áleýmettik reformalar da arqaý bolǵanyn atap ótti. Onyń oıynsha, mundaı teńgerimdi saıasat eldegi turaqtylyq pen boljamdylyqty arttyrýǵa septigin tıgizedi.
Sondaı-aq sarapshy álemdik JІÓ-niń teń jartysyna jýyǵyn ıelenip otyrǵan Azııa óńiriniń mańyzyna nazar aýdardy. Osy oraıda Qazaqstannyń geografııalyq orny saýda-ekonomıkalyq baılanystardy keńeıtýge, ınvestıtsııa tartýǵa jáne tranzıttik áleýetti arttyrýǵa tyń múmkindikter syılaıdy.
Bolashaǵy zor baǵyttardyń biri retinde ol azamattardy ekonomıkalyq úderisterge belsendi tartýdy, onyń ishinde kásipkerlik pen ınvestıtsııalyq belsendilikti damytýdy atady. Al syrtqy naryqta halyqaralyq birlestiktermen yntymaqtastyqty nyǵaıtyp, ekonomıkalyq baılanystardy ártaraptandyrý ózekti bolyp qala bermek.
Sarapshynyń pikirinshe, ishki turaqtylyq pen ıkemdi syrtqy ekonomıkalyq saıasattyń ushtasýy Qazaqstanǵa qubylmaly jahandyq ekonomıka jaǵdaıynda nyq qadam basýǵa múmkindik beredi.
Aıta keteıik, buǵan deıin Qazaqstan ekonomıkasy sońǵy 10 jylda eń joǵary ósimdi kórsetkenin habarlanǵan bolatynbyz.
