Qazaqstan álemdik ekonomıkada úzdik 50 eldiń qataryna endi

ASTANA. KAZINFORM — Qazaqstan jalpy ishki ónim (JІÓ) kólemi boıynsha álemniń eń iri 50 ekonomıkasynyń qataryna kirdi. Bul týraly The Economist basylymy  Halyqaralyq valıýta qorynyń sońǵy derekterine súıene otyryp habarlady.

Halyqaralyq valıýta qorynyń boljamyna sáıkes, 2026 jyly Qazaqstannyń eseptik jalpy ishki ónimi (JІÓ) shamamen 320 mıllıard dollardy quraıdy. Osy kórsetkishpen el Ortalyq Azııadaǵy jalǵyz memleket retinde álemniń eń iri 50 ekonomıkasynyń qataryna endi.

Jarııalanǵan ınfografıkada Qazaqstan ortasha kólemdegi ekonomıka sanatyna jatqyzylady jáne Perý, Portýgalııa, Fınlıandııa sııaqty eldermen qatar ornalasqan.

Dúnıejúzindegi eń iri ekonomıkalar qatarynda AQSh (JІÓ – shamamen 31,8 trln dollar) pen Qytaı (20,6 trln dollar) kósh bastap tur. Odan keıin Germanııa, Úndistan, Japonııa jáne Ulybrıtanııa keledi.

Halyqaralyq valıýta qorynyń boljamy boıynsha, 2026 jyly álemdik ekonomıkanyń jalpy kólemi 123,6 trln dollarǵa jetedi.

Aıta keteıik, buǵan deıin Qazaqstan naqty JІÓ-niń jyldyq ortasha ósimi 5,6%-ben kóshbasshy bes eldiń qataryna engen edi.