Qazaqstan álemdik deńgeıdegi jasandy ıntellekt klasterin qurýdy josparlap otyr
ASTANA. KAZINFORM — Qazaqstan Respýblıkasy Prezıdenti janyndaǵy Sheteldik ınvestorlar keńesiniń aıasynda QR Jasandy ıntellekt jáne tsıfrlyq damý mınıstrligi, halyqaralyq Citi korporatsııasy jáne Freedom Holding Corp arasynda aýqymdy jasandy ıntellekt klasterin birlesip salý týraly ózara túsinistik týraly úshjaqty memorandýmǵa qol qoıyldy. Bul týraly vedomstvonyń baspasóz qyzmeti málim etti.
— Memleket basshysynyń tapsyrmasy boıynsha biz Qazaqstanda jasandy ıntellektti damytýǵa múmkindik beretin ınfraqurylym qurýdamyz. Búginde tehnologııany tutynýshy bolý jetkiliksiz, ózindik esepteý qýatyna jáne AI-sheshimderdi ázirleýge arnalǵan jaǵdaılarǵa ıe bolý mańyzdy. Citi jáne Freedom Holding Corp kompanııalarymen memorandýmǵa qol qoıý — álemdik deńgeıdegi AI-klasterin qurý jobasyn júzege asyrý jolyndaǵy taǵy bir qadam. Ol ınvestıtsııalar, talanttar men tehnologııalyq kompanııalar úshin tartymdy ortalyqqa aınalady, sondaı-aq memleket, ǵylym jáne bıznes úshin qajetti ınfraqurylymdy qamtamasyz etedi, — dedi Jasandy ıntellekt jáne tsıfrlyq damý mınıstri Jaslan Mádıev seriktestiktiń mańyzdylyǵyna toqtalyp.
Ol sonymen qatar respýblıkanyń jańa úlgidegi ekonomıkaǵa kóship jatqanyn atap ótti.
Citi-diń memlekettik sektormen jumys jónindegi jahandyq basshysy Stefanı fon Frıdebýrg bastamanyń respýblıkanyń uzaq merzimdi damýy úshin mańyzdylyǵyn atap ótti:
— Bul Memorandým Qazaqstannyń tsıfrlyq transformatsııasynyń órshil kún tártibin jáne ozyq jasandy ıntellekt ınfraqurylymyn damytýdy qoldaýǵa degen ortaq umtylysymyzdy kórsetedi. Osy yntymaqtastyq arqyly biz memlekettik ınstıtýttarǵa, bızneske jáne zertteýshilerge qyzmet ete alatyn álemdik deńgeıdegi II-klasteri men esepteý qýattaryn qurýǵa yqpal etetin ınnovatsııalyq qarjylandyrý tásilderin baǵalaýǵa tyrysamyz. Biz Qazaqstannyń pozıtsııasyn nyǵaıtý úshin ózimizdiń jahandyq tájirıbemiz ben halyqaralyq kapıtalǵa qoljetimdilikti paıdalana alamyz, — dedi ol.
Freedom Holding Corp. Bas dırektory Tımýr Týrlov kompanııanyń jobany praktıkalyq iske asyrýǵa daıyndyǵyn rastady.
— Búgingi oqıǵa — Memleket basshysynyń tsıfrlandyrý jáne jasandy ıntellektti damytý salasynda júrgizip otyrǵan aýqymdy saıasatynyń tájirıbelik kórinisi. Tehnologııalyq egemendikke umtylý jáne Qazaqstandy tsıfrlyq derjavaǵa aınaldyrý kýrsy eń joǵary deńgeıde belgilendi, al biz qol qoıyp otyrǵan memorandým — osy baǵyttaǵy naqty qadam. Freedom Holding Corp. kompanııasynyń NVIDIA jáne OpenAI sııaqty jetekshi álemdik tehnologııalyq kompanııalarmen yntymaqtastyqta naqty tájirıbesi bar jáne biz bul saraptamany jobany tabysty júzege asyrý úshin qoldanýǵa nıettimiz, — ol.
Yntymaqtastyqtyń basty mindeti — ozyq GPU-tehnologııalarymen jabdyqtalǵan jasandy ıntellekt klasterin qurý, sondaı-aq memlekettik sektor, ǵylym jáne bıznes úshin negizgi ortalyqqa aınalatyn derekterdi óńdeý ortalyǵyn salý bolmaq.
Sonymen qatar, kelisim Qazaqstannyń jahandyq qarjy júıesindegi pozıtsııasyn nyǵaıtatyn tsıfrlyq aktıvter ekojúıesin qalyptastyrýdy kózdeıdi.
Taraptar tsıfrlyq bankıng jáne transshekaralyq esep aıyrysý salasyndaǵy yntymaqtastyqty damytýǵa, qarjylyq quraldardy naryqtyń barlyq qatysýshysy úshin qoljetimdi jáne ashyq etetin blokcheın-sheshimderdi engizýge nıetti ekenderin atap ótti.
Buǵan deıin Jaslan Mádıev sheteldik ınvestorlarǵa Qazaqstannyń tsıfrlyq bastamalaryn tanystyrdy.
