Qazaqstan álemdik týrısterdiń «altyn sanatyn» qalaı qyzyqtyra alady

«Qazaqstanǵa kólikpen jetýdi barynsha ońtaılandyrýǵa barynsha kúsh salyp jatyrmyz. Álbette, Qazaqstanǵa týrıster ushyp kelýi múmkin, alaıda el ishinde týrıster qaladan qalaǵa qalaı jetýi kerek? Bizde avtobýspen jetý máselesinde másele joq emes. Týrıstik avtobýstardyń parki búgingi tańda 90 paıyzǵa tozyp tur. Bizdiń poıyzdar áli týrıstik ónim retinde qalyptasa qoıǵan joq. Búgin bizdiń forýmǵa kelgen ıspanııalyq maman temir jol týrızmi álemde birshama suranysqa ıe ekenin erekshe atap ótti. Poıyzben bes kúndik týrdyń quny 3 myń eýroǵa deıin jetedi. Negizinen sheteldikter osyndaı sapardy qolaı kóredi. Mine, biz osy qyzyǵýshylyqty óz paıdamyzǵa jarata bilýimiz kerek. Sebebi, poıyzben týrısterdiń «altyn sanaty», ıaǵnı elý jastan asqan adamdar el aralaıdy», - dedi.

Tımýr Dúısenǵalıevtiń aıtýynsha, elý jastan asqan týrıster - bilimdi ári aqshaly kisiler. Mine, naqty osy sanattaǵy týrıster bizdiń eldi aralaýdy qolaı kórýi ábden múmkin.

«Sondyqtan, Memleket basshysynyń tapsyrmasyn, zańnamalyq salada atqarylyp jatqan sharýalardyń (týrızm týraly jańa zańnyń daıyndalýy - avt.) esebinen kelesi jyldyń ózinde qandaı da bir nátıjelerge qol jetkizermiz degen senimdemin. Mysaly, Qazaqsanda osy jyly kelgen týrısterdiń sany ótken jylmen salystyrǵanda 22 paıyzǵa artqan. Buǵan qala kóshelerindegi kórinis aıqyn dálel. Osy sebepti, týrızmge degen senimimiz zor. Qazaqstan shıkizat elinen týrızm salasyndaǵy sapaly qyzmet kórsetetin elge aınalarmyz degen úmit bar», - dedi «Kazakh Tourism» UK» AQ basqarma tóraǵasynyń orynbasary.

Tımýr Dúısenǵalıevtyń aıtýynsha, týrıster Qazaqstanǵa záýlim qonaq úıler men áýejaılardy kórýge kelmeıdi. Olar kóbinese aıryqsha oryndarǵa barǵysy keledi.

«Demek, jańa tájirıbe jınaqtaǵymyz keledi. Árbir óńirde shynynda da aıryqsha oryndar baryna tolyq senemin. Demek, aıryqsha oryndarymyzdy óte qyzyqty etip kórsete alar resýrstarymyzdy baǵalaı alyp otyrǵan joqpyz. Ańyzǵa aınalǵan oryndar qanshalyq. Qazaqstan tabıǵatymen baı. Sondyqtan, árbir óńirdegi aıryqsha erekshelikti injý-marjanǵa aınaldyryp jiberýge ábden bolady», - deıdi ol.

Tımýr Dúısenǵalıev atap ótkendeı, Qazaqstanda týrızm salasynan túsken paıda Jalpy ishki ónimniń 1 paıyzyn ǵana quraıdy. Endigi maqsat - 2023 jylǵa deıin bul túsimdi 8 paıyzǵa deıin jetkizý.

«Aýyl sharýashylyǵynyń tabysy JІÓ-niń 5 paıyzyn quraıdy. Al biz 8 paıyzdy kózdep otyrmyz», - deıdi Tımýr Dúısenǵalıev.

Eske sala ketsek, elordada «Birlikke barar jolda» atty Jibek jolyna qatysýshy elderiniń halyqaralyq forýmy ótip jatyr.