Qazaqstan álemdik tennıs elıtasyna myqtylyǵyn dáleldedi

Búgin Astanada ótken baspasóz máslıhatynda tennısten Qazaqstannyń erler quramasynyń Chehııa tennısshilerimen kezdesýindegi teńdessiz jeńisine baılanysty elimizdiń Tennıs qaýymdastyǵynyń vıtse-prezıdenti Ádil Bórlibaev osylaı atap kórsetti.

«Biz tarıhı oqıǵaǵa kýá boldyq. Qazaqstan 2 márte álemdik deńgeıdegi myqty ujymdardy san soqtyryp ketti. Kóp jyldar boıy ózgeriske ushyramaǵan Álemdik toptaǵy ornyqqan komandalar arasynda biz ózimiz týraly serpindi túrde jar saldyq, úlken shý, tańdanys oıattyq. Keleshekte de osy topta turaqtap qalamyz degen oıdamyn», - dedi Á. Bórlibaev.

Eske sala keteıik, Qazaqstannyń tennıs quramasy Devıs Kýbogy aıasynda 4-6 naýryzda dodanyń byltyrǵy jyldyń jartylaı fınalısi Chehııamen kezdesý ótkizip, jerlesterimiz 3:2 esebimen jeńiske jetken bolatyn. Bunyń aldynda Astanada Shveıtsarııa quramasy qazaqstandyqtardan 5:0 esebimen jeńilis taýyp ketken bolatyn.

«Bul oıyndaǵy barlyq úsh kún óte aýyr boldy, árbir match, dop, upaı úlken qıyndyqpen keldi. Bizdiń jigitterge, komandaǵa senim joǵaltpastan, ystyq qoldaý kórsetken jankúıerlerge rahmet», - dedi ol.

Qarsylastardyń kortynda, Chehııanyń Ostrava qalasynda ótken kezdesýde bizdiń enshimizge alǵashqy upaıdy elimizdiń 1-raketkasy Andreı Golýbev saldy. Ol birinshi kúni chehııalyq ıAn Gaıekpen kúsh synasty.

«Birinshi kúni biz esepti teń jaǵdaıda aıaqtadyq. Andreı Golýbevtiń jeńisimen komanda alǵashqy oıyn kúnine oılastyrǵan jospardy oryndady», - degen Á. Bórlibaev, «chehııalyqtar dál osy ıAn Gaıek pen Andreı Golýbev oınaǵan alǵashqy matchta upaı enshileýge úmittengen. Raýndtyń birinshi kezdesýinde-aq biz olarǵa óz strategııasyn qaıta qarap shyǵýlaryna májbúrledik», - dedi.

Al Mıhaıl Kýkýshkın sol kúni Tomash Berdyhpen raketka aıqastyrdy.

«Ekinshi oıynda Kýkýshkın Álemniń 7-raketkasy Tomash Berdyhpen kezdesýi boldy. Ondaǵy matchtyń alǵashqy sátin Mısha tamasha ótkizdi. Biraq qazylardyń qateligimen onyń doby sanalmaı, jeńis Berdyhqa berildi. Sol moraldyq jáne psıhologııalyq aýyrtpalyqtan keıin, nátıjesinde esep 1:1 bolyp teńesti», - deıdi Á. Bórlibaev.

Ekinshi kúni juptyq kezdesý ótkizgen komandalar saıysynda Qazaqstan jigitteri eýropalyqtarǵa jol berip qoıdy. 6 naýryzda Golýbev T. Berdyhtan aılasyn asyryp, kezdesý taǵdyryn 2:2 esebine jetkizdi. Al sońǵy kezdesýde Mıhaıl Kýkýshkın joǵaryda aty atalǵan ıAn Gaıekti tize búktirdi.

Nátıjesinde Halyqaralyq tennıs federatsııasynyń (ITF) Devıs Kýbogi reıtıngisinde Qazaqstan 4 satyǵa kóterilip, 16-orynnan 12-orynǵa jaıǵasty. Tennısten Qazaqstannyń erler quramasy bunyń aldynda ózderinen birneshe saty joǵary turǵan, alaıda Devıs Kýboginiń álemdik toptaǵy alǵashqy matchtarynda jeńiliske ushyraǵan Úndistan, Chılı jáne Avstrııa quramalaryn basyp ozdy. Reıtıngtiń úzdik úshtigi ózgeriske ushyraǵan joq. Birinshi orynda buryńǵysynsha Ispanııa tur. Ekinshi orynda Serbııa quramasy bolsa, úshinshi orynda qazaqstandyqtardan tartqan jeńilisterine qaramastan Chehııa tennısshileri keledi.

Qazaqstan endigi kezdesýdi Argentına quramasymen ótkizedi. Olardyń sapynda Hýan Martın Del Potro men Davıd Nalbandıan syndy álemdik deńgeıdegi tisqaqqan tennısshiler oınaıdy. Kelesi kezeńge Argentına men Qazaqstan elderinen bólek, Serbııa, Shvetsııa, Germanııa, AQSh, Ispanııa jáne Frantsııa shyǵyp otyr.

Devıs Kýbogy - bul erler ulttyq qurama komandalary arasyndaǵy eń iri jarys bolyp tabylatyn halyqaralyq tennıstik týrnır. Aǵymdaǵy týrnırdiń jeńimpazdary - Ispanııanyń quramasy. Joǵary deńgeıli bul dúbirli saıysqa qazaqstandyqtar alǵash ret qatysyp otyr.