Qazaqstan álemdik kóshbasshylar qataryna óziniń ekonomıkasyn ınnovatsııalyq jańǵyrtý arqyly ǵana ene alady - A.Kúrishbaev
ASTANA. 5 sáýir. QazAqparat - Qazaqstan álemdik kóshbasshylar qataryna óziniń ekonomıkasyn ınnovatsııalyq jańǵyrtý arqyly ǵana ene alady.
Bul pikirin búgin Astanadaǵy S.Seıfýllın atyndaǵy Qazaq Agrotehnıkalyq ýnıversıtetinde ótken «Sáken taǵylymy» 8-inshi Respýblıkalyq ǵylymı-teorııalyq konferentsııada atalmysh oqý ornynyń rektory Aqylbek Kúrishbaev bildirdi.
«Ýnıversıtet basshylyǵy bul ǵylymı forýmǵa úlken mán beredi, sebebi onda bizdiń belgili ǵalymdarymyzben birge, elimizdiń bolashaq ǵylymı elıtasy - jas mamandar usynylyp otyr. Qazirgi ýaqytta memleket saıasatynda ǵylymdy damytý basty basymdyq retinde anyqtalyp otyr. Óıtkeni, úlken terrıtorııaǵa ıe jáne halyq sanynyń tyǵyzdyǵy az - bizdiń el, álemdik kóshbasshylar qataryna óziniń ekonomıkasyn ınnovatsııalyq damytý arqyly ǵana ene alady. Ol úshin birinshi kezekte, joǵary bilikti ǵylymı kadrlar qajet, sondyqtan eldiń joǵary bilim júıesi men ǵylymdy damytý mańyzdy», - dedi ol.
A.Kúrishbaev buǵan deıin Qazaqstanda ǵylymnyń damýynda basty kedergilik faktor - shektelgen qarjylandyrý bolyp kelgendigin atap ótti.
«Ǵylymnyń damýynyń qandaı qıyn kezeńderin bastan ótkergenimiz týraly ǵalymdarymyz biledi. Biraq ótken jyly «Ǵylym týraly» QR Zańy qabyldanǵannan keıin, elimizde ǵylymdy damytýdyń arnaıy baǵdarlamasy ázirlendi. Eger 2011 jyly ǵylymdy qarjylandyrý 28 mlrd. teńge bolsa, bıyl ol 42 mlrd. teńgeni qurady. Búginde ǵylymǵa bólinetin qarjy ІJÓ-niń 0,5 paıyzyn qurasa, 2015 jylǵa qaraı ol ІJÓ-niń - 1, odan keıingi jyldary 2 jáne 3 paıyzyn quraıtyn bolady. Sondyqtan, búgin ǵylymnyń damýyna qolaıly jaǵdaılar jasalyp otyr dep áste aıtýǵa bolady. Sol sebepti, óziniń jumysyn basqa baǵytqa ýaqytyly baǵdarlaı alǵan ujymdar men joǵary oqý oryndar ǵana jetistikti damıtyndyǵyn túsiný úshin úlken strateg bolýdyń qajeti joq», - dedi rektor.
Sondaı-aq JOO basshysy, Ǵylymı keńestiń sheshimimen ýnıversıtettiń damý baǵdarlamasy qaıta qaralǵandyǵyn, oqý orny budan bylaı zertteý jumystaryna kóptep den qoıatyndyǵyn atap kórsetti.
«Biz ǵylymı-zertteý ýnıversıteti dárejesin alýǵa nıettimiz. Bıyl ǵylymdy qarjylandyrý, tek Bilim jáne ǵylym mınıstrliginiń tarapynan 102 mln. teńgeni qurap otyr. Ótken jyly mundaı qarjylandyrý bolǵan joq. Endiz biz Aýyl sharýashylyǵy mınıstrliginiń, ıaǵnı «QazAgroInnovatsııa» AQ-nyń jelisi boıynsha qarjylandyrýdy kútip otyrmyz», - dedi.
Onyń aıtýynsha, bıyldan bastap novatorlarǵa ınnovatsııalyq granttar da bóline bastaıdy, bul ǵalymdardyń ázirlemelerin óndiriske engizýge septigin tıgizip qana qoımaı, olarǵa shet elderge shyǵýǵa múmkindik beretin bolady.
