Qazaqstan álemdi ıadrolyq synaqtarǵa tyıym salýǵa shaqyrdy
ASTANA. QazAqparat - Qazaqstan álem elderin ıadrolyq qaýipsizdikti qamtamasyz etý men men ıadrolyq qarýdy taratpaý týraly kelisimge qosylýǵa shaqyrdy, dep habarlaıdy QazAqparat.
Bul týraly búgin Astanada ótip jatqan Pagýosh ǵalymdar qozǵalysynyń 62-shi konferentsııasynda QR Parlamenti Senatynyń tóraǵasy Qasym-Jomart Toqaev málimdedi.
«Jahandyq ıadrolyq qaýipsizdik salasyndaǵy qazirgi ahýal, atap aıtqanda, Koreı túbegindegi shıelenisken daǵdarys úlken alańdaýshylyq týǵyzyp otyr. Mundaı teketires pen jaýlasý saldary birqatar óńirlik elder úshin de, halyqaralyq qatynastardyń tutas júıesi úshin de asa qaýipti bolýy múmkin. Osyǵan baılanysty, nazarlaryńyzdy Prezıdentimiz Nursultan Nzarabaevtyń «Álem. HHІ ǵasyr» manıfesine aýdarǵym keledi. Onda jahandyq ıadrolyq qaqtyǵystyń qaýpi men apatty ekeni eskertilgen. Sol sebepti Qazaqstan álemdik qaýymdastyqtyń ıAdrolyq qarýdy taratpaý týraly shart rejımin nyǵaıtý men ıAdrolyq synaqtarǵa jan-jaqty tyıym salý týraly shartty kúshine engizýge baǵyttalǵan kúsh-jigerdi arttyrýǵa shaqyrady. Atalǵan negizgi kelisimderge álemniń barlyq elderi qosylýy kerek dep sanaımyz», - dedi Q.Toqaev.
Onyń aıtýynsha, barynsha qaýipsiz álemdi qurý isi ıadrolyq tejeý doktrınasyna emes, halyqaralyq senim men yntymaqtastyq sharalaryna negizdelýi tıis. BUU Qaýipsizdik Keńesiniń turaqty músheleri osyndaı álemdik tártipti qalyptastyrýda sheshýshi ról atqarýy tıis.
«Atomdy beıbit túrde paıdalaný quqyǵyn MAGATE-niń qatań baqylaýymen barlyq memleketterdiń ádiletti iske asyrýy jahandyq ıadrolyq qaýipsizdikti nyǵaıtýǵa yqpal etedi. Irannyń ıadrolyq baǵdarlamasy jónindegi máseleniń sheshilýi Taıaý jáne Orta Shyǵys óńirinde beıbitshilik ornatý múmkindikterin arttyra tústi. Tómen baıytylǵan ýran bankiniń qurylýymen memleketterdiń atom energetıkasyn damytýǵa degen talpynysyn qanaǵattandyrarlyq kepildi jaǵdaı jasalaryna senimdimiz», - dep atap ótti Senat Tóraǵasy.
Eske sala ketsek, 25-29 tamyz kúnderi Qazaqstan astanasynda ǵylym men jahandyq problemalardy talqylaıtyn Pagýosh ǵalymdar qozǵalysynyń 62-shi konferentsııasy ótedi. Onda Pagýosh ǵalymdar qozǵalysynyń qatysýshylary, BUU ókilderi, halyqaralyq uıymdar men qaýipsizdik salasyndaǵy saıası qaıratkerler men halyqaralyq sarapshylar jańa ıadrolyq qaterlerge qarsy turý jóninde sóz qozǵamaq.
