Qazaqstan álemdegi tsıfrlyq ınnovatsııanyń keleshegin qalyptastyryp jatyr — Citigroup ókili
ASTANA. KAZINFORM — Citigroup kompanııasynyń tutynýshylarmen jumys boıynsha bas basqarýshysy Devıd Lıvıngston QR Prezıdenti janyndaǵy sheteldik ınvestorlar keńesiniń 38-shi plenarlyq otyrysynda Qazaqstannyń tsıfrlyq saladaǵy jetistikterine baǵa berdi.
— Qazaqstan ádettegideı damýdyń mańyzdy kezeńinde. Bul el ekonomıkalyq transformatsııany júzege asyrýmen birge, aımaqtaǵy ǵana emes, kúlli álemdegi tsıfrlyq ınnovatsııanyń keleshegin qalyptastyryp jatyr. Citigroup kompanııasy zor mártebemen Qazaqstannyń uzaq merzimdi seriktesi bolyp qala beredi, — dedi ol.
Sonymen birge, Devıd Lıvıngston Qazaqstannyń naqty tsıfrlyq bastamalaryna toqtaldy.
— Biz Qazaqstan bıliginiń kóregendigin joǵary baǵalaımyz. Memlekettik tsıfrlyq aktıvter qory, Alataý qalasyn damytý, Ulttyq banktiń tsıfrlyq teńgeni engizýi tárizdi bastamalar Qazaqstandy ınnovatsııalyq damýdyń álemdik kóshbasshylary qataryna qosady. Bizdiń kompanııa, ásirese, Alataý qalasynyń áleýeti men maqsattaryna joǵary baǵa beredi. Qazaqstan memlekettik ınstıtýttardy, ınfraqurylymdy jáne normatıvtik-quqyqtyq bazany damytýdyń arqasynda senimdi qarjylyq júıeni quryp jatyr. Ol uzaq merzimdi halyqaralyq ınvestıtsııa tartýǵa múmkindik beredi. Mundaı zor tsıfrlyq muratty júzege asyrý álemdik deńgeıdegi ınfraqurylymdy talap etedi. Sizderdiń NVIDIA-men sýperkompıýterlik qýattardy qurý jónindegi kelisimińiz bul baǵyttaǵy asa mańyzdy qadam, — dedi ol.
Aıta keteıik, buǵan deıin Jaslan Mádıev QR Prezıdenti janyndaǵy sheteldik ınvestorlar keńesinde Qazaqstannyń tsıfrlyq bastamalaryn tanystyrǵanyn jazǵanbyz.
