Qazaqstandyq Alem.Cloud álemdegi TOP-100 sýperkompıýter qataryna endi
ASTANA. KAZINFORM — Ulttyq sýperkompıýter «Alem.Cloud» álemdegi eń qýatty esepteý júıeleriniń halyqaralyq reıtıngi TOP-500 tiziminde 86 oryndy ıelendi, dep habarlaıdy Jasandy ıntellekt jáne tsıfrlyq damý mınıstrligi.
Bul reıtıngke tek HPL (High-Performance Linpack) standarty boıynsha táýelsiz testileýden ótken, ıaǵnı álemdik deńgeıde moıyndalǵan esepteý ónimdiligine ıe klasterler ǵana engiziledi.
«Alem.Cloud» ulttyq sýperkompıýter klasteri Memleket basshysynyń tapsyrmasy boıynsha Jasandy ıntellekt jáne tsıfrlyq damý mınıstrligine qarasty «Ulttyq aqparattyq tehnologııalar» AQ ınfraqurylymynyń negizinde qurylǵan bolatyn. Sýperkompıýter jasandy ıntellekt, joǵary ónimdi esepteýler jáne úlken derekterdi taldaý baǵyttaryndaǵy jobalardy iske asyrýǵa arnalǵan. Klasterdiń arhıtektýrasy joǵary tyǵyzdyqtaǵy biryńǵaı GPU-keshenine biriktirilgen 64 HPE Cray serveriniń bazasynda iske qosylǵan. Árbir esepteý toraby joǵary jyldamdyqty qamtamasyz etetin NVIDIA H200-ben jabdyqtalǵan.
Alem.Cloud sýperkompıýteri jobasy Birikken Arab Ámirlikterindegi G42 tobyna kiretin Presight halyqaralyq tehnologııalyq kompanııasymen birlesip júzege asyryldy. Presight joǵary ónimdi esepteý klasterlerin jobalaý men AI ekojúıesin damytýǵa tehnıkalyq qoldaý kórsetip, álemdik úzdik tájirıbelerdi Qazaqstannyń qajettilikterine beıimdeýge múmkindik berdi.
- Júıe joǵary petaflops dıapazonynda ónimdilikti qamtamasyz etedi jáne Qazaqstan men Ortalyq Azııa aımaǵyndaǵy eń qýatty esepteý platformasy bolyp sanalady. Sýperkompıýter baǵdarlamalyq jasaqtamasy SUSE Harvester (vırtýalızatsııa jáne taratylǵan esepteýlerge arnalǵan jańa býyn gıpervızory), SUSE Rancher (Kubernetes pen AI-júktemelerin ortalyqtan basqarý platformasy) tehnologııalaryn qamtıdy. Klasterdiń qaýipsizdigin qamtamasyz etý úshin SUSE NeuVector (konteınerlik qaýipsizdik, jelilik baqylaý jáne rantaım-qorǵaý júıesi), Palo Alto Networks jelilik segmentatsııa jáne kıberqaýipsizdik sheshimderi, sondaı-aq Thales krıptografııalyq jáne apparattyq shıfrlaý quraldary qoldanylady, - delingen habarlamada.
Buǵan deıin «UAT» AQ tehnıkalyq mamandary halyqaralyq seriktestermen birlesip, HPL (Linpack) ádistemesi boıynsha keshendi testileý júrgizdi. Maqsaty - júıeniń naqty esepteý ónimdiligin ólsheý jáne onyń TOP500 reıtınginde tirkeýge daıyn ekenin rastaý. Nátıjesinde sýperkompıýter qajetti kórsetkishterge jetip, Qazaqstannyń jahandyq TOP500 reıtıngine resmı túrde ótinim berýine múmkindik berdi.
Aıta keteıik, Qazaqstanda sýperkompıýterdiń qýatyn tıimdi paıdalaný tártibi ázirlendi.