Qazaqstan álemdegi eń yqpaldy 35 memlekettiń qataryna endi
ASTANA. KAZINFORM – Qazaqstan halyqaralyq World Population Review statıstıkalyq platformasy jarııalaǵan Most Powerful Countries 2026 reıtınginde 100 memlekettiń arasynda 34-orynǵa turaqtady.
Qazaqstan Danııa (36-oryn), Birikken Arab Ámirlikteri (37-oryn), Ońtústik Afrıka Respýblıkasy (38-oryn), Norvegııa (39-oryn), Saýd Arabııasy (40-oryn), Pákistan (42-oryn) jáne Iran (46-oryn) sekildi birqatar memleketten ozyq tur.
Reıtıng neni baǵalaıdy?
Reıtıng memleketterdiń halyqaralyq arenadaǵy qýaty men yqpalyn baǵalaıdy. Bul rette elderdiń ekonomıkalyq jáne saıası yqpaly, kóshbasshylyq róli, halyqaralyq odaqtastyq baılanystary men áskerı áleýeti eskeriledi. Osylaısha memleketterdiń ekonomıkalyq aýqymy ǵana emes, álemdik arenadaǵy bedeli men yqpaldy orny da baǵalanady.
Reıtıngige engen postkeńestik memleketter arasynda Qazaqstan Reseıden (11-oryn) keıin ekinshi orynǵa jaıǵasqan. Al Ýkraına 51-oryn, Lıtva 56-oryn, Belarýs 57-oryn, Ózbekstan 71-oryn, Latvııa 74-oryn, Estonııa 75-oryn, Armenııa 80-oryn jáne Grýzııa 91-oryn ıelengen.
Reıtıngtiń alǵashqy úshtigine Qytaı, AQSh jáne Úndistan endi. Alǵashqy ondyqqa sondaı-aq Germanııa, Japonııa, Ońtústik Koreıa, Frantsııa, Ulybrıtanııa, Meksıka jáne Italııa kirdi.
Qazaqstannyń álemdik reıtıngte 34-orynnan kórinýi — elimizdiń halyqaralyq arenadaǵy orny men yqpalyn aıqyndaıtyn mańyzdy kórsetkish. Bul nátıje memlekettiń ekonomıkalyq áleýeti, saıası salmaǵy, áskerı qýaty men halyqaralyq baılanystary sekildi birqatar ólshem negizinde qalyptasqan baǵalaýdy kórsetedi.
Buǵan deıin halyqaralyq reıtıng agenttikteri Qazaqstan ekonomıkasynyń damý qarqynyna oń baǵa bergen bolatyn.
