Qazaqstan álemdegi eń bedeldi hımııa olımpıadalarynyń birinde tórt medal jeńip aldy
ASTANA.KAZINFORM - Ózbekstannyń Tashkent qalasynda ótken 58-shi Halyqaralyq hımııa olımpıadasynda (International Chemistry Olympiad, IChO 2026) Qazaqstan quramasy 100 paıyzdyq nátıje kórsetti. Ulttyq quramanyń barlyq tórt múshesi júldeger atanyp, bir altyn jáne úsh kúmis medal jeńip aldy.
Oqý-aǵartý mınıstrligi málimetinshe, altyn medaldi Óskemen qalasyndaǵy NIS-tiń 11-synyp oqýshysy Jenishanova Aızere jeńip aldy.
Kúmis medal ıegerleri:
• Astana qalasy Nura aýdanyndaǵy NIS-tiń 11-synyp oqýshysy Qalı Ábilmansur;
• Almaty qalasyndaǵy №134 lıtseıdiń 11-synyp oqýshysy Poletaev Danıl;
• Astana qalasyndaǵy Spectrum International School mektebiniń 11-synyp oqýshysy Jaqsylyqov Ansar.
Ulttyq quramanyń jetekshileri:
• Begdaır Sanjar Samatuly - KAIST ýnıversıtetiniń (Koreıa Respýblıkasy) stýdenti, halyqaralyq jáne respýblıkalyq olımpıadalardyń jeńimpazy;
• Nurtazın Anýar Abaıuly - hımııa jáne ekonomıka magıstri, halyqaralyq jáne respýblıkalyq olımpıadalardyń jeńimpazy.
Bıylǵy olımpıadaǵa álemniń 90-nan astam elinen 350-den astam daryndy oqýshy qatysty. Qatysýshylar teorııalyq jáne praktıkalyq eki bes saǵattyq kezeńde kúrdeli hımııalyq esepterdi shyǵaryp, zerthanalyq jumystardy oryndady.
Halyqaralyq hımııa olımpıadasy mektep oqýshylaryna arnalǵan álemdegi eń bedeldi jeti pándik olımpıadanyń qataryna kiredi. Qazaqstan bul olımpıadaǵa 1998 jyldan beri qatysyp keledi jáne jyl saıyn joǵary nátıje kórsetip keledi.
Bıylǵy jetistik – daryndy oqýshylardy qoldaý, olımpıadalyq qozǵalysty júıeli damytý jáne pedagogterdiń kásibı eńbeginiń nátıjesi. Bul jeńis qazaqstandyq oqýshylardyń halyqaralyq jetistikteriniń jarqyn jalǵasy boldy. Buǵan deıin Halyqaralyq fızıka olımpıadasynda Qazaqstan quramasy el tarıhynda tuńǵysh ret bes altyn medal jeńip alǵan bolatyn.
Qazaqstan oqýshylary Gonkongte robototehnıka jarysynda top jarǵanyn jazǵan edik.
