Qazaqstan álemdegi eń baqytty elder reıtınginde 33-orynǵa kóterildi

ASTANA. KAZINFORM – Qazaqstan jahandyq baqyt ındeksi reıtınginde pozıtsııasyn aıtarlyqtaı jaqsartyp, World Happiness Report 2026 esebinde 33-oryndy ıelendi. Bul eldiń zertteýge qatysqan búkil ýaqyt ishindegi eń joǵary nátıjesi jáne bir jyl ishinde +10 satyǵa kóterilýi bolyp otyr.

Esep jyl saıyn BUU, Oksford ýnıversıteti jáne Gallup analıtıkalyq kompanııasynyń qatysýymen jarııalanyp, ómir sapasyn baǵalaýǵa arnalǵan eń iri jahandyq zertteýlerdiń biri sanalady. 2026 jyly reıtıngige 147 el engen, al baǵalaý turǵyndardyń óz ómirine bergen baǵasyna negizdelgen.

Aıta keterligi, Qazaqstan tizimde tek joǵarylap qana qoımaı, Frantsııa men Sıngapýr sııaqty damyǵan birqatar eldi de artta qaldyrǵan. Bul ómirge qanaǵattaný deńgeıi tek ekonomıkaǵa ǵana tikeleı baılanysty emestigin kórsetedi.

Esepke sáıkes, Qazaqstandaǵy ortasha ómirge qanaǵattaný deńgeıi 6,633 ballǵa jetip, ótken jylmen salystyrǵanda ósim baıqalǵan. El TMD jáne Ortalyq Azııa memleketteri arasynda baqyt deńgeıi boıynsha kóshbasshy bolyp otyr.

Zertteýshiler elderdi alty negizgi kórsetkish boıynsha baǵalaıdy: tabys deńgeıi, áleýmettik qoldaý, ómir súrý uzaqtyǵy, tańdaý erkindigi, jomarttyq jáne jemqorlyqty qabyldaý deńgeıi. Osy faktorlardyń jıyntyǵy halyqtyń jalpy ál-aýqat sezimin qalyptastyrady.

Jahandyq reıtıngide kósh basynda burynǵysynsha Fınlıandııa tur, ol birneshe jyldan beri birinshi oryndy saqtap keledi, al Soltústik Eýropa elderi dástúrli túrde úzdik oryndardy ıelenedi.

Sarapshylar Qazaqstannyń joǵarylaýyn áleýmettik ahýaldyń jaqsarýymen, qoǵamdaǵy qoldaý seziminiń kúsheıýimen jáne ómir sapasyna qanaǵattanýdyń artýymen baılanystyrady. Birden 10 orynǵa kóterilý – top-40 elder arasynda eń aıqyn ósimderdiń biri.

Osylaısha, Qazaqstan jahandyq ál-aýqat kartasyndaǵy pozıtsııasyn nyǵaıtyp, ómir sapasy joǵary elder qataryna birtindep jaqyndap keledi.

Buǵan deıin Qazaqstan Azııadaǵy eń baqytty elder úshtigine kirgenin jazǵan edik.