Qazaqstan álemdegi altyndy eń kóp satyp alǵan bes eldiń qataryna endi
ASTANA. KAZINFORM – Qazaqstan 2026 jyldyń ekinshi toqsanynyń qorytyndysy boıynsha ortalyq bankter arasynda altyndy eń kóp satyp alǵan álemdegi bes eldiń qataryna endi, dep habarlaıdy Dúnıejúzilik altyn keńesi.
Uıymnyń toqsandyq sholýyna sáıkes, osy kezeńde Qazaqstan Ulttyq banki eldiń altyn qoryn 15 tonnaǵa ulǵaıtqan.
Altyn satyp alý kólemi boıynsha birinshi orynda Polsha tur. El 2026 jyldyń ekinshi toqsanynda altyn qoryn 51 tonnaǵa kóbeıtken.
Qytaı 33 tonna, Ózbekstan 16 tonna, Qazaqstan 15 tonna altyn satyp alǵan. Sondaı-aq Iordanııa men Chehııanyń ortalyq bankteri qorlaryna 6 tonnadan altyn qosqan.
Jalpy, álemniń ortalyq bankteri ekinshi toqsanda shamamen 289 tonna altyn satyp alǵan. Bul 2025 jyldyń sáıkes kezeńimen salystyrǵanda 62%-ǵa kóp. Byltyr osy ýaqytta satyp alý kólemi shamamen 178 tonnany quraǵan.
– Altynǵa suranystyń artýyna geosaıası belgisizdik, toqsan ishinde baǵaly metaldyń arzandaýy jáne memleketterdiń halyqaralyq rezervterin ártaraptandyrýǵa umtylysy áser etti, – delingen Dúnıejúzilik altyn keńesiniń sholýynda.
Uıym júrgizgen saýalnamaǵa sáıkes, ortalyq bank ókilderiniń 89%-y aldaǵy bir jylda álemdik altyn qorynyń kólemi artady dep kútedi. Al respondentterdiń 45%-y óz elderiniń altyn qoryn ulǵaıtýdy josparlap otyrǵanyn aıtqan.
Qazaqstanda bir gramm altyn qansha turatynyn mynaý siltemeden oqyńyz.
