Qazaqstan álem nazaryn ózine aýdaryp otyr
ASTANA. QazAqparat - Elbasy bıyl onynshy ret ótken Astana ekonomıkalyq forýmyna kelgen Nobel syılyǵynyń laýreattarymen jáne álemdik deńgeıdegi tanymal ekonomıstermen kezdesti. N.Nazarbaev Astana ekonomıkalyq forýmyna qatysýshylardyń Qazaqstanǵa -arnaıy at basyn buryp, jahandyq ekonomıkalyq máselelerdi talqylaý maqsatynda kelgenderi úshin rızashylyǵyn bildirdi.
Qazaqstan Prezıdenti álemdik deńgeıdegi zııalylarmen kezdesý barysynda Astanada ótip jatqan «EKSPO - 2017» halyqaralyq mamandandyrylǵan kórmesiniń taqyryby qazirgi ozyq tehnologııalar zamanynda ózekti ekenin aıtyp ótti.
«Kórmeniń arqasynda Qazaqstan jańa tehnologııalardyń damýy turǵysynan álem nazaryn ózine aýdaryp otyr. Soǵan qarap qorshaǵan ortamyz qalaısha túbegeıli ózgerip otyrǵanyn kóre alamyz. Elektromobılderdi, ózdiginen júretin kólikti, nanotehnologııalardy, sondaı-aq jańa energııa túrlerin biz fýtýrıstik dúnıeler dep sanaıtynbyz. Qazir sonyń bári shyndyqqa aınalýda», - dedi Memleket basshysy.
Nursultan Nazarbaev jan-jaqty jańǵyrýǵa yqpal etetin kún tártibindegi halyqaralyq ózekti máselelerdi aıta kele, jahandyq problemalardy sheshý úshin kúsh-jigerdi jumyldyrý qajettigine toqtaldy.
«AQSh-tyń Parıj kelisiminen shyǵatyny týraly málimdemesi, Katardyń tóńiregindegi jaǵdaı ornyqty damýdy kúrdelendire tústi. Túrli elderdegi ekologııalyq problemalar, ja¬han¬danýǵa qarsylyq úderisi, kóshi-qon aǵyny men paternalızm saýda jasaýǵa, ózara qarym-qa¬ty-nasqa jáne ıntegratsııaǵa kedergi keltirýde», - dedi.
Kezdesý barysynda A.Kvasnevskıı, S.Mesıch, S.Tımashev, R.Chýng, D.Frenkel, A.Spıtsyn, D.Daokýı Lı, I.Sakong, P.Tıchanskıı, D.Perkıns, D.Garold, N.Taleb, H.Bıýrkner baıandama jasady. Іs-shara sońynda Elbasymyz salıqaly jıynǵa qatysýshylarǵa áńgimeniń mazmundy bolǵany úshin alǵys aıtyp, ózekti máselelerdi Astana ekonomıkalyq forýmy barysynda odan ári talqylaýdy usyndy.
Qazaqstan Prezıdenti N.Nazarbaev «Astana EKSPO - 2017» kórme kesheniniń Kongress-ortalyǵynda ótken «Jańa energııa - jańa ekonomıka» atty H Astana ekonomıkalyq forýmynyń plenarlyq otyrysyna qatysty. Elbasy bıylǵy ekonomıkalyq forým ¬Eýrazııa keńistigi úshin tarıhı betburysty kezeńinde ótkizilip otyrǵanyn, Úndistan men Pákistan ShYU kirgen soń 3 mıllıard adamdy qamtıtyn naryǵy bar jańa jahandyq oıynshy paıda bolǵanyn, ShYU elderin Uly Jibek jolyn jańǵyrtý jobasymen qamtý jańa ekonomıkalyq sýbóńirdi qalyptastyrǵanyn aıtty.
Qazaqstan Prezıdenti elderdiń baılyǵy men olardyń turǵyndarynyń ál-aýqatyn tanytatyn kórsetkishterdi esepteýdiń jańa ádisterin ázirleý, sondaı-aq álemdik qarjy qurylymyn transformatsııalaý qajettigine, ekonomıkalyq ósim taza energetıkany damytýǵa jáne ekologııany saqtaýǵa negizdelýge tıis ekenine nazar aýdaryp, Parıj kelisimin jalpyǵa birdeı oryndaýdyń mańyzdylyǵyna toqtaldy. Sonymen qatar, N.Nazarbaev Qazaqstannyń úshinshi jańǵyrýy aıasynda elimizde aýqymdy jumys bastalǵany jáne energetıka salasyn jańǵyrtýǵa baılanysty atqarylyp jatqan sharalar jóninde aıtty.
«10 jyl buryn biz TMD elderi arasynan birinshi bolyp Ekologııalyq kodeksti qabyldadyq. 2012 jyly «Energııa únemdeý jáne energııa tıimdiligin arttyrý týraly» zań kúshine endi. Sol jyly elimiz Halyqaralyq «EKSPO - 2017» mamandandyrylǵan kórmesin ótkizý quqyǵyn jeńip aldy. Qazir biz sonyń aýmaǵynda turmyz. Kórmeniń taqyryby - «Bolashaqtyń energııasy», - dedi Qazaqstan Prezıdenti.
Sóz sońynda Elbasy N.Nazarbaev bolashaqta jer sharynyń ekologııalyq turǵydan taza bolýy úshin ıadrolyq qarýsyz álem tujyrymdamasynyń mańyzdy ekenin atap ótti.
