Qazaqstan álem elderinen IT-talanttardy izdeıdi

ASTANA. KAZINFORM – Elimizdiń IT-naryǵy qarqyndy ósim kórsetýde. Sońǵy 5 jylda IT-qyzmetter eksporty 15 esege artty, al IT-naryqtyń kirisi jylyna 2 trln teńgege jetti. Bul týraly Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtyp berdi.

Mınıstrdiń aıtýynsha, IT-sala eldegi ortasha jalaqydan eki ese joǵary jalaqysy bar jumys oryndaryn ashyp keledi.

– Astana Hub ekojúıemizdi otandyq jəne sheteldik IT-kompanııalar úshin tartymdy etip, sala damýynyń negizgi katalızatoryna aınaldy. Alaıda biz munymen toqtap qalmaımyz. Higgsfield tájirıbesi qazaqstandyq «ıýnıkorn» startaptardyń ýaqyty kelgenin kórsetti. Bul baǵytqa odan ári kúshti serpin berý qajet, – dedi J. Mádıev Úkimettiń keńeıtilgen otyrysynda.

Ol elimizge zertteýshiler, ınjenerler jáne tehnologııalyq kásipkerler kerek ekenin, osy maqsatta álemniń túkpir-túkpirinen talanttardy tartý baǵdarlamasyn iske qosatynyn aıtty.

– Mysaly, Telegram kompanııasymen birlesip, Qazaqstanǵa eń myqty sporttyq baǵdarlamashylardy tartatyn bolamyz. Ótken jyldyń qorytyndysy boıynsha Astana Hub ınfraqurylymy eldiń barlyq óńirlerin qamtydy.

Bul jumys aldaǵy ýaqytta da ınfraqurylymdy keńeıtý jáne mazmundyq turǵydan tolyqtyrý baǵytynda jalǵasady. Sondaı-aq búkil Qazaqstan boıynsha talanttardy anyqtaý jáne startaptardy arttyrý jumysy kúsheıtiledi. Bul úderiste Alem.ai ortalyǵy aıryqsha ról atqarady, – dedi Jaslan Mádıev.

Sonymen birge, Ulttyq bank qarajaty esebinen tolyǵatyn Jasandy ıntellekt qory quryldy. Qazirgi ýaqytta osy qordy qarjylandyrý tetigi pysyqtalyp jatyr. JI qory mańyzdy tsıfrlyq jobalar men bilim berý bastamalaryn qoldaıtyn bolady.

Buǵan deıin sala mınıstri Qazaqstanda salalyq JI modelder qurylatynyn aıtqan edi.