Qazaqstan aldyńǵy qatarly qarjy ortalyqtarymen turaqty áýe baılanystarynyń jelisin keńeıtedi

ASTANA. QazAqparat - Bıyl 7 jańa áýe baǵdary ashyldy. Bul týraly búgin Astanada áýejaı máselelerine arnalǵan IATA konferentsııasynda QR IDM Azamattyq avıatsııa komıtetiniń tóraǵasy Beken Seıdahmetov málim etti.

«Áýe saparlarynyń geografııasyn keńeıtý boıynsha Memleket basshysynyń tapsyrmasyn júzege asyrý aıasynda bıyl 7 jańa baǵdar ashyldy. ótken jyly 13 baǵdar ashylǵan bolatyn. «100 naqty qadam» Ult josparyn júzege asyrý aıasynda aldyńǵy qatarly qarjy ortalyqtarymen turaqty áýe baılanystarynyń jelisi keńeıtiledi», - dedi komıtet basshysy.

Qazirgi kezde Astana qalasy áýejaıynan 12 halyqaralyq qarjy ortalyqtarynyń ishinde jeteýine reıster oryndalýda.

«Atap aıtqanda, Frankfýrt, Beıjiń, Ystambul, Máskeý, Seýl, London jáne Parıjge reıster qamtylǵan. 2019 jylǵa deıin Astanadan taǵy bes baǵyt ashylady dep kútilýde, ıaǵnı Dýbaı, Gonkong, Tokıo, Sıngapýr, Nıý-Iork qalalaryna tasymaldaýlar iske asyrylady», - dedi B. Seıdahmetov.