Qazaqstan aldaǵy ýaqytta qurylys materıaldaryn eksportqa shyǵaratyn elge aınalady
ASTANA. QazAqaparat - Qazaqstan aldaǵy ýaqytta qurylys materıaldaryn eksportqa shyǵaratyn elge aınalady. Bul týraly búgin halyqpen eseptik kezdesýin ótkizgen QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
«Shyǵarylǵan ónimder eksportqa baǵyttalǵan bolýy shart. Bul búgingi kúnniń eń ózekti máselesi. Biraq, jasyratyny joq, Qazaqstan ártúrli qurylys materıaldaryn shetelden ımporttap otyr. Al óz kezeginde Qazaqstan qurylys materıaldaryn shetelge eksporttap jatyr ma?» - dep surady mınıstrden Atyraý turǵyny eseptik kezdesý barysynda.
Saýalǵa jaýap bergen mınıstr elimizdiń qurylys sektorynyń ósýi baıqalyp otyrǵanyn, osy jyldyń alǵashqy toqsanynda bul saladaǵy ósim 6,7 protsent bolǵanyn atap ótti.
«Qurylys materıaldaryn jasaý sektorynda, óńdeýde ósim 7 protsentti qurady. Qazaqstanda kópqabatty úı salynǵanda 70-80 paıyzy ózimizdiń materıal qoldanylady. Al jekemenshik úı salǵanda bul kórsetkish 90 paıyzdan asady. Endi ol shetelge shyǵa ma, joq pa? Shyǵady. Búgingi kúni gıpsokarton, boıaýlar, bıtým syndy taýarlar shyǵarylady. Jyl saıyn eksportqa shyǵarylatyn taýar kólemi artyp keledi. Bolashaqta Ortalyq Azııada osy salany damtyyp, shetelge qurylys materıaldaryn shyǵaratyn memleketterdiń birine aınalamyz dep josparlaýdamyz», - dedi Jeńis Qasymbek.
