Qazaqstan aldaǵy ýaqytta 13 memleketpen readmıssııa týraly kelisim jasaıdy
ASTANA. QazAqparat - Búgin Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasynyń Úkimeti men Germanııa Federatıvtik Respýblıkasynyń Úkimeti arasyndaǵy adamdardy qabyldaý jáne tranzıtteý týraly kelisimdi (readmıssııa týraly kelisim) ratıfıkatsııalaý týraly» zań jobasyn maquldady.
Atalǵan kelisim 2009 jyldyń jeltoqsan aıynda Berlınde jasalyp, oǵan Qazaqstan men Germanııanyń syrtqy ister mınıstrleri qol qoıǵan.
Zań jobasy Qazaqstan men Germanııa elderiniń aýmaǵyna kirý jáne onda bolý sharttaryn buzǵan adamdardy anyqtaýdy jáne qaıtarýdy kózdeıdi. Bul sanatqa elimizdiń aýmaǵyna zańsyz kirgen nemese zańdy kirgen, biraq vızanyń ruqsat merzimi ótip ketkennen keıin sonda qalǵan adamdar jatady. Tutastaı alǵanda, kelisim zańsyz kóshi-qonmen kúresýge múmkindik beredi. Budan bólek, eldiń aýmaǵynda zańsyz júrgen adamdardy halyqaralyq quqyqqa sáıkes qabyldaýdy, sondaı-aq olardyń tranzıtin jeńildetedi.
Іshki ister vıtse-mınıstri Vladımır Bojkonyń aıtýynsha, búgingi tańda Qazaqstan tarapynan álemniń 12 elimen readmıssııa týraly kelisim jasalǵan. Olardyń arasynda Germanııa, Shveıtsarııa, Cheh, Latvııa, Lıtva, Reseı, Ózbekstan, Norvegııa, Belarýs, Vengrııa, Benılıýks memleketteri jáne Moldova bar. «Qazirgi tańda jaqyn jáne alys shet eldermen readmıssııa týraly 13 kelisimshart ázirlený ústinde. Bul qujattar memlekettik organdar arasyndaǵy kelisimder satysynda tur», - dedi V. Bojko.
Zań jobasy palatanyń aldaǵy jalpy otyrysyna shyǵarylatyn bolady.
