Qazaqstan aldaǵy úsh jylda tsıfrlyq elge aınalýy kerek - Qasym-Jomart Toqaev

TARAZ. KAZINFORM - Memleket basshysy Qasym-Jomart Toqaev Jambyl oblysy turǵyndarymen kezdesýi barysynda jasandy ıntellekti men tsıfrlyq ekonomıka – damyǵan elderge tán basty úrdis ekenin atap ótti.

- Men úsh jyl ishinde Qazaqstan tsıfrlyq el bolý kerek degen maqsatty aıqyndadym. Jasandy ıntellekti men tsıfrlyq ekonomıka – damyǵan elderge tán basty úrdis. AQSh jáne Qytaı – bul saladaǵy eń ozyq elder. Qazaqstan da órkenıettiń dańǵyl jolynan shet qalmaýy kerek. Sondaı jaǵdaı bolsa, keler urpaq bizdi keshirmeıtini sózsiz. Ondaı qatelikke jol bermeımiz. Joldaýymda men osy taqyrypqa kóp zeıin qoıdym. Qazirgi tańda Úkimet belsendi jumysqa kiristi, biraz joba iske asyryldy, biraq aldymyzda aýqymdy jumys bar, - dedi Memleket basshysy.

Sondaı-aq ol aldaǵy jyl shyn máninde úlken betburys jyly bolatynyn jetkizdi.

- Túbegeıli ózgeristerdiń jańa kezeńi bastalady. Bul týraly keıinirek jarııalap aıtamyn.  Bárimizdiń maqsat-múddemiz – ortaq. Bul – Ádiletti, Qaýipsiz, Kúshti jáne Taza Qazaqstandy qurý.  Eń bastysy, elimizdiń yntymaq-birligi myqty bolýy kerek. Memleket pen qoǵam birlesip, tyǵyz baılanysta jumys isteýi qajet. Bir el, bir halyq bolyp, jumyla bilsek, mindetti túrde maqsatymyzǵa jetemiz, - dedi Memleket basshysy. 

Aıta keteıik, Memleket basshysy Jambyl oblysynda jumys saparymen júr. Prezıdent onda birqatar ónerkásiptik jáne áleýmettik nysandardy aralap kórdi.