Qazaqstan aldaǵy qysta da Reseıden elektr qýatyn ımporttaýy múmkin

ASTANA. KAZINFORM – Qazaqstan bıyl qysta Reseıden 330 MVt elektr qýatyn ımporttaýy múmkin. Bul týraly«KEGOC» aktsıonerlik qoǵamynyń basqarma tóraǵasy Nábı Aıtjanov Úkimet otyrysynan keıin ótken baspasóz máslıhatynda aıtty.

- Maksımaldy júkteme saǵattarynda bizdegi elektr qýatynyń qajetteligi 14 957 MVt bolady. Ony jınaqtaýǵa 14,6 MVt generatsııa kerek. Azdaǵan tapshylyq bar – 330 MVt-taı bolady. Qazir ony Reseıden keletin aǵyn esebinen jaýyp otyrmyz. Jylytý maýsymynyń barysynda jóndeýde bolǵan stansalar qaıta iske qosylady. Osyǵan baılanysty tapshylyq boljap otyrǵan joqpyz. Bola qalǵan kúnniń ózinde Reseıden ımporttaımyz. 20 qazanda «Moınaq» GES-i jóndeýden keıin iske qosyldy. Onyń ústine Jambyl GRES-iniń qosymsha blogyn qostyq. Sondyqtan óz qajettiligimizdi tolyqtaı ózimiz jaýyp turmyz. Bar tapshylyqty Reseımen manevr arqyly jabamyz. Elektrdi ajyratý sharalaryn josparlap otyrǵan joqpyz, - dedi kompanııa basshysy.

Onyń aıtýynsha, elimizde elektr qýatyn tutyný kólemi jyl saıyn artyp keledi.

- Byltyrǵymen salystyrǵanda elektr qýatyn tutyný kólemi saǵatyna 4 mlrd KVt-qa ulǵaıdy. Bul bir jylda 4,2 paıyz ósti degen sóz, aıtarlyqtaı úlken kólem. Esesine jańa generatsııalar qosymsha iske qosyldy. Onyń ishinde jańartylatyn qýat ta bar. Sonyń esebinen tapshylyqty jaýyp otyrmyz, - dedi Nábı Aıtjanov.

Al Energetıka mınıstri Erlan Aqkenjenov Qazaqstan elektr tapshylyǵynan 2029 jyly qutylatynyn aıtqan bolatyn.