Qazaqstan Alataý qalasyn Ońtústik Koreıamen birlesip damytady
ASTANA. KAZINFORM – Qazir Alataý qalasyn damytý boıynsha úkimetaralyq kelisimder daıyndalyp jatyr. Bul jóninde QR Ónerkásip jáne qurylys mınıstri Ersaıyn Naǵaspaev Qazaqstan-Koreıa birlesken komıssııasynyń saýda-ekonomıkalyq jáne ǵylymı-tehnıkalyq yntymaqtastyq boıynsha 11-otyrysynda málimdedi.
– Tehnologııa men ınnovatsııa ortalyǵy bolatyn Alataý qalasyn salý – Qazaqstannyń ambıtsııasy zor jobalarynyń biri. Ol koreı bıznesi úshin de jańa múmkindikter ashady. Eske salaıyn, jýyrda Alataý qalasynyń arnaıy quqyqtyq mártebesi týraly konstıtýtsııalyq zań qabyldanǵan edi. Qujatta ınvestorlarǵa erekshe jaǵdaı jasaý, ákimshilik rásimderdi jeńildetý jáne bıznesti qoldaýdyń zamanaýı mezanızmderi qarastyrylǵan. Biz koreı kompanııalaryn Alataý qalasyn salý jobasyna atsalysýǵa, qalalyq, týrıstik jáne qonaqúı ınfraqurylymyn órkendetýge shaqyramyz, – dedi ol.
Budan bólek, mınıstr Koreıa Respýblıkasynyń Jer, ınfraqurylym jáne kólik mınıstrligin, sondaı-aq, KIND korporatsııasyn Qazaqstannyń ınstıtýtsıonaldyq seriktesteri retinde joǵary baǵalaıtynyn atap ótti.
– Sondaı-aq, sheteldik jobalardy memleket jáne jeke kompanııalar arqyly júzege asyrýda tıimdi modelge aınalǵan One Team Korea bastamasyn qoldaımyz. Qazaqstan tarapynyń usynysymen, Alataý qalasyn damytý boıynsha úkimetaralyq kelisimder daıyndalyp jatyr. Bul qujat yntymaqtastyqty nyǵaıtyp, aldaǵy jumystardyń jol kartasyn anyqtap, birlesken jobalardy tıimdi túrde júzege asyrýǵa qajetti mehanızmderdi quratynyna senemin, – dedi ol.
Aıta keteıik, buǵan deıin mınıstr Ońtústik Koreıa kompanııalaryn Aqtaý jáne Quryq porttaryn damytýǵa shaqyrǵanyn jazǵanbyz.
