Qazaqstan Ál-Aqsa meshitine jasalǵan shabýyl shıelenisiniń kúsheıýine alańdaýly

ASTANA. QazAqparat – Qazaqstan Taıaý Shyǵystaǵy Ál-Aqsa meshitine jasalǵan shabýyl shıelenisiniń kúsheıýine alańdaýly. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Qazaqstan qasıetti «Ál-Aqsa» meshitinde musylmandarǵa shabýyl jasalýyna baılanysty Taıaý Shyǵystaǵy shıelenistiń órshýine qatysty óziniń alańdaýshylyǵyn bildiredi. Qalyptasqan jaǵdaıda taraptar ustamdylyq tanytyp, zorlyq-zombylyqqa jáne ahýaldyń odan ári ýshyǵýyna ákeletin qadamdardan, sondaı-aq arandatý is-áreketterinen bas tartady dep úmittenemiz»,– dedi Aıbek Smadııarov mınıstrlikte ótken baspasóz máslıhatynda.

Onyń málimdeýinshe, qasıetti Ramazan aıy men Pesah meıramy kezeńinde saıası, dinı jáne qoǵamdyq kóshbasshylar atalǵan shıelenisti azaıtýǵa bar kúshin salady dep úmit artady.

«Qazaqstan árdaıym toleranttyq jáne dinder arasyndaǵy dıalogty nyǵaıtýǵa shaqyra otyryp, Birikken Ulttar Uıymy qaýipsizdik keńesiniń qararlaryna sáıkes Taıaý Shyǵys máselesin beıbit jolmen sheshýge baǵyttalǵan halyqaralyq qoǵamdastyqtyń kúsh-jigerin qoldaıdy», - deıdi ol.