Qazaqstan Aqtaý portynyń áleýetin arttyryp jatyr
ASTANA. KAZINFORM – Aqtaý teńiz portynda keme qatynasynyń qaýipsizdigin arttyrýǵa jáne Transkaspıı halyqaralyq kólik baǵytynyń (THKB) ótkizý qabiletin ulǵaıtýǵa baǵyttalǵan Aqtaý porty akvatorııasyn tereńdetý jobasyn iske asyrý jalǵasyp jatyr.
Kólik mınıstrligi málimetinshe, búginde bas merdiger — China Harbour Engineering Company Ltd. kompanııasy jobany iske asyrý úshin qajetti geodezııalyq zertteý jumystaryn jáne alynǵan derekterdi óńdeýdi aıaqtady. Daıyndyq kezeńi aıasynda arnaıy tereńdetý jumystaryn júrgizetin flottyń, basqa da tehnıkalar men jabdyqtardy jumyldyrý jumystary júrgizilip jatyr.
Sonymen qatar ýchaskede qorshaý bógetin salý jumystary jalǵasyp jatyr. Qazirgi ýaqytta jalpy uzyndyǵy 785 metr bolatyn qurylystyń 680 metri salyndy. Negizgi tereńdetý jumystaryn bastaý osy jyldyń shilde aıynyń ekinshi jartysyna josparlanǵan.
Jobany tolyq aıaqtaý 2026 jyldyń sońyna deıin kózdelip otyr. Jumystardyń nátıjesinde port akvatorııasy 6–7 metrge deıin tereńdetiledi. Bul kemelerdiń tolyq júktelýin qamtamasyz etýge jáne júkterdi óńdeý tıimdiligin arttyrýǵa múmkindik beredi.
Joba THKB áleýetiniń artýyna yqpal etetin negizgi faktorlardyń biri bolady. 2028 jylǵa qaraı onyń qýatyn 6 mln tonnadan 10 mln tonnaǵa deıin ulǵaıtý josparlanyp otyr. Bul Qazaqstannyń Shyǵys – Batys baǵyty boıyndaǵy mańyzdy kólik-logıstıkalyq torap retindegi rólin odan ári nyǵaıtýǵa yqpal etedi.
2026 jyldyń 5 aıynda THKB arqyly Qytaı – Eýropa baǵyty boıynsha konteınerlik tasymal kólemi 30% ósti.
Transkaspıı baǵytyn damytý úshin Aqtaý portynda teńiz túbin tereńdetý qolǵa alynǵanyn jazǵan edik.
