Qazaqstan aqshany jylystatýmen kúres táýelsiz reıtınginde 27 orynǵa alǵa jyljydy

Qazaqstan aqshany jylystatýǵa qarsy táýelsiz reıtıngte pozıtsııasyn edáýir jaqsartyp, 100-den astam eldi artta qaldyrdy, dep habarlaıdy Kazinform QR Qarjylyq monıtorıng agenttiginiń baspasóz qyzmetine silteme jasap.

2023 jyldyń 13 qarashasynda Bazel menedjment ınstıtýty aqshany jylystatýǵa jáne terrorızmdi qarjylandyrýǵa qarsy kúres salasyndaǵy eń bedeldi derekkóz bolyp tabylatyn jyl saıynǵy «Basel AML Index» reıtıngin jarııalady.

Bul reıtıngte Qazaqstan 100-den astam eldi artqa tastap, 4,71 upaı jınaı otyryp, pozıtsııasyn 27 tarmaqqa jaqsartty.

Bul elimiz úshin 2012 jyldan beri jarııalanyp kele jatqan reıtıng tarıhyndaǵy eń joǵarǵy nátıje.

Qazaqstan reıtıngte Qytaı, Túrkııa, BAÁ, Serbııa, Bolgarııa, Vengrııa, Rýmynııa, Katar, Bahreın jáne Saýd Arabııasy sekildi elderden basyp ozdy.

Táýekel deńgeıi eń tómen top-5 eldiń qataryna Islandııa, Fınlıandııa, Estonııa, Andorra jáne Shvetsııa kirdi.

Aıta keteıik, zertteý qylmystyq jolmen alynǵan kiristerdi jylystatý jáne terrorızmdi qarjylandyrýdyń (KJ/TQ) joǵary táýekelderine yqpal etetin ártúrli faktorlardy ólsheıtin 5 baǵyt boıynsha 18 kórsetkishke negizdeledi.

«Alynǵan nátıje FATF standarttaryna sáıkestigine Ózara baǵalaýdy sátti aıaqtaý men aqshany jylystatýǵa qarsy júıeniń barlyq bólikteriniń jumys isteý tıimdiliginiń arqasynda múmkin boldy. Elimizdiń qarjylyq qaýipsizdigin odan ári nyǵaıtý jumystary jalǵasatyn bolady»,-delingen habarlamada.