Qazaqstan AQSh jáne Iranmen yntymaqtastyqty damytýǵa múddeli
ASTANA. QazAqparat - Búgin Aqordada Qazaqstanda tirkelgen sheteldik dıplomatııalyq mıssııalar basshylarymen kezdesý barysynda QR Prezıdenti Nursultan Nazarbaev 2016 jyly Qazaqstannyń syrtqy saıasatyndaǵy perspektıvalar týraly aıtyp berdi.
«Qazaqstannyń tranzıttik aýmaq retindegi róli aıqyn kórinip tur. Osy oraıda buny dáleldeıtin birneshe kórsetkishterdi atap ótkim keledi. 2013 jylmen salystyrǵanda 2015 jyly Qytaı-Qazaqstan-Eýropa baǵyty boıynsha konteınerler aǵyny 6 myńnan 45 myńǵa deıin artty. 2016 jyly bul kórsetkish 95 myń konteınerdi quramaq. Bul elimizdiń ınfraqurylymdyq saıasatynyń nátıjesi. Tynyq muhıtynan bastap Qazaqstan, Reseı, Eýropa arqyly jáne Iran-Parsy shyǵanaǵy arqyly shyǵatyn temir jol magıstraldary salyndy. Osy oraıda Uly Jibek joly baǵdarlarynyń barlyq kezeńderi ashylady. Eger de 2013 jyly osy baǵdar boıynsha tek 77 poıyz ǵana júrip ótse, bıyl 1100 poıyz júredi dep kútilýde. Aldaǵy ýaqytta bul kórsetkish arta túsedi»,-dedi Prezıdent.
Budan bólek Elbasy Ortalyq Azııa memleketterimen yntymaqtastyqty damytý erekshe basymdyqqa ıe ekenin atap ótti. Osy oraıda Prezıdent óńirdiń mańyzdy problemalaryn sheshý úshin Ortalyq Azııa elderin birigýge taǵy da shaqyrdy. Onyń ishinde sý máselesi, saýda-sattyq, ortaq qaýipsizdik máseleleri qamtylǵan.
Sonymen qatar N. Nazarbaev eki aı buryn elimizdiń iri ınvestıtsııalyq saýda seriktesi bolyp tabylatyn EO-men keńeıtilgen áriptestik týraly kelisimge qol qoıylǵanyn eske salyp ótti. Bul óz kezeginde taýar aınalymyn arttyrýǵa, sondaı-aq eýropalyq elderden ınvestıtsııalardy tartýda mańyzdy qadam bolyp tabylady.
«AQSh tarapy Qazaqstan ekonomıkasynda sheteldik iri ınvestorlardyń biri bolyp tabylady. Biz osy memleketpen yntymaqtastyqty keńeıtýge nıettimiz»,-dep toqtaldy Memleket basshysy.
Sonymen qatar N. Nazarbaev Qazaqstan ıslam álemimen jáne Taıaý Shyǵyspen ózara qarym-qatynasty nyǵaıtýǵa múddeli ekenin qadap aıtty. Bul turǵyda Iranmen tolyq aýqymda saýda-ekonomıkalyq yntymaqtastyqty damytý kózdelip otyr.
Prezıdent óz sózinde elimiz Aýǵanstannyń ekonomıkalyq áleýmettik damýyna járdem jasaýdy jalǵastyratynyn, osy eldiń ınfraqurylymdyq damýyna, jastarǵa bilim berý turǵysynda kómek beretindigin jetkizdi.
Elbasy Azııa-Tynyq muhıty óńiri elderimen eknomıkalyq, ınvestıtsııalyq, tehnologııalyq yntymaqtastyqty jandandyrý baǵytyna toqtaldy. Dáıekti túrde Qazaqstannyń Afrıka, Latyn Amerıkasy jáne Karıb basseıni elderimen qatynastary damyp kele jatqanyn sóz etti.
Memleket basshysynyń paıymynsha, elimizdiń DSU-ǵa músheligi syrtqy saýda geografııasyn keńeıtýge, ınvestıtsııalyq áleýetti arttyrýǵa múmkindik beredi.
