Qazaqstan-AQSh: Úkimettik delegatsııa mingen ushaqtardan alym alý joıylady
«Memleket basshysynyń 2018 jylǵy qańtardaǵy Vashıngtonǵa sapary aıasynda QR Úkimeti men AQSh Úkimeti arasyndaǵy memlekettik áýe kemelerine aeronavıgatsııalyq qyzmet kórsetý úshin tólemaqy alýǵa qatysty kelisimge qol qoıyldy. Kórsetilgen kelisimdi ratıfıkatsııalaý týraly nazarlaryńyzǵa usynylǵan zań jobasy Qazaqstan men AQSh arasyndaǵy yntymaqtastyqty jandandyrýǵa baǵyttalǵan. Kelisimniń maqsaty úkimettik delegatsııalar mingen memlekettik áýe kemelerinen aeronavıgatsııalyq alymdardy ortaq tóleýden bosatý bolyp tabylady. Mundaı kelisim «Áýe keńistigin paıdalaný jáne avıatsııa týraly» QR Zańynyń talaptaryna sáıkes ratıfıkatsııalaýǵa jatady», - dedi «Qazaqstan Respýblıkasynyń Úkimeti men Amerıka Qurama Shtattarynyń Úkimeti arasyndaǵy memlekettik áýe kemelerine aeronavıgatsııalyq qyzmet kórsetý úshin tólemaqy alýǵa qatysty kelisimdi ratıfıkatsııalaý týraly» QR Zańynyń jobasyn tanystyrǵan QR Investıtsııalar jáne damý birinshi vıtse-mınıstri Roman Sklıar.
Onyń aıtýynsha, kelisimniń erejelerin oryndaý úshin taraptar ár ushýǵa tıisti dıplomatııalyq ruqsattar beredi. Kelisim talaptaryn oryndaýǵa jaýapty mekemeler qazaqstandyq taraptan - Syrtqy ister mınıstrligi men Investıtsııalar jáne damý mınıstrliginiń Azamattyq avıatsııa komıteti bolyp tabylady.
«Jalpy Qazaqstan Respýblıkasynan Amerıkaǵa reıster, AQSh-tan qazaqstandyq tarapqa áýe kemeleriniń ushýy jyl saıyn júzege asyrylady. Atalǵan kelisim aıasynda memlekettik áýe kemeleriniń ushý sanynyń shekteýli ekendigin eske ala otyryp, aeronavıgatsııalyq qyzmet kórsetý boıynsha qyzmetterdi kórsetetin azamattyq avatsııa uıymyna eleýli ekonomıkalyq zııan bolmaıdy. Kórsetilgen kelisimdi ratıfıkatsııalaǵan jaǵdaıda qandaıda bir teris quqyqtyq jáne áleýmettik saldary joq», - dedi ol.
Májilis depýtattary zań jobasyn biraýyzdan maquldap, qaýly qabyldady.
