Qazaqstan AQSh týrısteri úshin qaýip deńgeıi tómen elder qatarynda
ASTANA. KAZINFORM — Qazaqstan AQSh Memlekettik departamentiniń týrıstik baǵalaýynda eń qolaıly el sanatyna jatqyzyldy. Qazaqstanǵa kelgen AQSh azamattaryna qarapaıym saqtyq sharalaryn ustaný jetkilikti, dep habarlaıdy Kazinform agenttigi AQSh Memlekettik departamentine silteme jasap.
Level 1 — AQSh Memlekettik departamentiniń saıahattaýǵa keńes berý júıesindegi eń tómengi deńgeı. Ol saıahattaýshylarǵa qarapaıym saqtyq sharalaryn qoldaný jetkilikti ekenin bildiredi. Qazaqstan osy sanatqa jiktelgen.
Sonymen qatar, bul sanattaǵy elderge Kanada, Japonııa, Shveıtsarııa, Portýgalııa, Polsha, Rýmynııa, Slovakııa jáne Slovenııa kiredi.
AQSh Memlekettik departamenti júıesinde tórt deńgeıli keńes berý qarastyrylǵan. Level 2 — saqtyq sharalaryn kúsheıtýdi, Level 3 — saıahattaý qajettiligin qaıta qaraýdy, al Level 4 — saıahattan bas tartýdy usynady.
Ulybrıtanııa, Ispanııa jáne Shvetsııa 2-deńgeıge jiktelgen. Túrkııa da Level 2 sanatynda.
Bul jerde AQSh Memlekettik departamentiniń jikteýi — halyqaralyq qaýipsiz elder reıtıngisine jatpaıtynyn atap ótken jón. Bul AQSh azamattaryna arnalǵan jáne halyqaralyq saıahatpen baılanysty qaýipsizdik táýekelderin eskeretin usynystar júıesi.
Sondyqtan Qazaqstan taǵy birqatar el qatarynda AQSh Memlekettik departamentiniń saıahatqa qatysty keńesinde qolaıly elder sanatyna kiredi.
Buǵan deıin Ózbekstanǵa barǵan sheteldik týrısterdiń ár tórtinshisi — Qazaqstan azamaty ekenin habarlaǵan edik.
