Qazaqstan AQSh pen Reseı arasyndaǵy sanktsııalyq teke-tirestiń kúsheıýine alańdaýly - Elbasy
ASTANA. QazAqparat - Qazaqstan AQSh pen Reseı arasyndaǵy sanktsııalyq teke-tirestiń kúsheıýine alańdaýly. Bul týraly búgin Qazaqstan aýmaǵynda qurylǵan Halyqaralyq tómen baıytylǵan ýran bankin resmı ashý saltanatynda Elbasy Nursultan Nazarbaev aıtty, dep habarlaıdy QazAqparat.
«XXI ǵasyrdaǵy turaqtylyq pen ıadrolyq qaýipsizdik eń birinshi kezekte resmı ıadrolyq derjavalarǵa baılanysty. Olardyń arasynda qarym-qatynas adamzat úshin basty ári aıqyndaýshy mánge ıe. Búginde biz AQSh pen Reseı arasyndaǵy santsııalyq teke-tirestiń kúsheıýine alańdaýlymyz. Bul álemdegi eki jetekshi ıadrolyq memleket arasyndaǵy shıelenisti kúsheıte túsedi dep sanaımyz. Bul barsha adamzatty alańdatpaı qoımaıdy», - dedi Elbasy.
Osy rette Memleket basshysy saýda-ekonomıkalyq janjaldyń kúshtik teke-tirkeske ulasyp ketýine jol bermeý barynsha mańyzdy ekendigin basa aıtty.
«Koreı Halyqtyq Demokratııalyq Respýblıkasy tóńiregine qatysty jaıtta biz BUU Qaýipsizidik keńesiniń 2371 qararyn túbegeıli qoldaımyz. AQSh, Reseı jáne Qytaı syndy úsh ıadrolyq memlekettik yntymaqtastyǵy úshin baıypty tuǵyrnama dál osy máselede bastalýy múmkin dep esepteımiz. Búginde ýaqyt úsh zatty talap etedi. Olar: jahandyq úılesimdilik, saıası erik -jiger, tabandy ózara is-qımyl», dedi Nursultan Nazarbaev.
Qazaqstan Prezıdenti halyqarlyq tynys-tirshilikti saıası senim men júıeli dıalogqa qaıta oraltý qajettigin de basa aıtyp ótti.
«Qazaqstan óziniń bitimgershilik mıssııasyna adal, óziniń hal-qadiri men múmkindiginshe kúrdeli álemdik problemalardy sheshýge úles qosyp keledi. Ózderińizde biletindeı, ótken jyly sırııaaralyq kelissózderdiń bes kezeńi Astanada ótti. Olar áskerı is-qımyldyń toqtaýyna túrtki boldy. Sonymen qatar Almatyda Irannyń ıadrolyq problemasyna qatysty kelissózder júrgizilgen bolatyn. Munan bólek, Qazaqstannyń reseılik-túrkııalyq búlingen qarym-qatynasty durys jolǵa qoıýǵa da óz úlesin qosqany qupııa emes. Biz bitimgershilik baǵytta odan ary da kómek kórsetýge daıynbyz. Qazaqstan Ýkraınanyń ońtústik-shyǵysyndaǵy daǵdarysty sheshýge de biraz qadam jasady jáne dıalogty odan ary ilgeriletýge járdem berýge daıyn. Biz atalǵan janjal taraptaryn ony eńserý joldaryn tabýǵa shaqyramyz»,- dedi Nursultan Nazarbaev.
