Qazaqstan - AQSh kelisimi – Orta dáliz úshin serpilis: amerıkalyq sarapshylardyń kózqarasy
ASTANA. KAZINFORM – Qazaqstan men AQSh arasynda elimizge 300 júk lokomotıvin jetkizý týraly kelisimdi amerıkalyq sarapshylar talqylaný ústinde. Olardyń pikirinshe, bul kelisim AQSh-tyń Orta dálizdiń kólik ınfraqurylymyn damytýda tyǵyz yntymaqtastyqqa daıyndyǵyn tanytyp otyr, dep habarlaıdy Kazinform menshikti tilshisi.
Qazaqstannyń Wabtec-ten 4,2 mlrd dollarǵa lokomotıvter satyp alýy Astananyń kóp vektorly strategııasynyń syrtqy saıasattan tys jáne kommertsııalyq baılanystarǵa qalaı taralyp otyrǵanyn kórsetedi. Mundaı pikirdi «Henry Jackson Society» qoǵamdyq birlestiginiń ǵylymı qyzmetkeri Darren Spınk bildirdi.
- Astana amerıkalyq kompanııamen jumys isteı otyryp, eki iri kórshileri Qytaı jáne Reseımen qatar Batyspen ekonomıkalyq seriktestikterin ártaraptandyryp jatyr. «Qazaqstan temir jolynyń» aralas flot boıynsha tásili Qazaqstannyń ulttyq temir jolynyń amerıkalyq tehnologııalar men servıske súıenýin qamtamasyz etedi, bul bir syrtqy jetkizýshige táýeldilik qaýpin azaıtady. Bul mámile sondaı-aq Qazaqstandy qarjylandyrý múmkindikterin keńeıtip, Orta dálizdiń temirjol júıesin nyǵaıtý úshin AQSh-tyń tereńirek yntymaqtastyǵy úshin perspektıvaly múmkindikterdi kórsetedi, - dep málimdedi Spınk.
Halyqaralyq salyq jáne ınvestıtsııa ortalyǵynyń energetıka, ekonomıkalyq ósý jáne qaýipsizdik baǵdarlamasy dırektorynyń orynbasary Ýeslı Aleksandr Hıldiń aıtýynsha, kelisimshart Orta dálizdi odan ári damytýǵa jol ashyp otyr.
- Mámile tek Qazaqstan-Amerıka qarym-qatynasy úshin ǵana emes, sonymen qatar Orta dálizdiń keleshegi úshin de úlken serpilis. Bul logıstıkalyq kelisim, ol ekonomıkanyń syrtqy faktorlaryn boldyrmaıtyndyqtan ónerkásiptiń barlyq túrlerine keıingi ınvestıtsııalardy aıtarlyqtaı jeńildetedi, - dep atap ótti ol.
Ýeslı Aleksandr Hıll sondaı-aq Tramptyń Truth Social áleýmettik jelisindegi Qazaqstan prezıdenti Qasym-Jomart Toqaevty iri kelisimge qol qoıýymen quttyqtaǵan jazbasyn erekshe atap ótti.
Sarapshynyń aıtýynsha, Aq úı basshysy kelisimniń eki tarap úshin mańyzdylyǵyna toqtalyp, keń kólemde quttyqtaý málimdeme jasaǵan.
Buǵan deıin saıasattanýshy, halyqaralyq kommýnıkatsııalar sarapshysy Azamat Baıǵalıev te prezıdent Qasym-Jomart Toqaev pen Donald Tramp arasyndaǵy áńgimege erekshe toqtalǵanyn jazǵan bolatynbyz.
- Qasym-Jomart Toqaevtyń prezıdent Donald Tramppen áńgimesi – bólek plıýs. Jahandyq saıasattyń kil serkeleri AQSh-ta jınalyp jatqan ýaqytta mundaı kelissózdi uıymdastyrý eń qıyny bolyp tur. Mundaǵy eń mańyzdy sáttiń biri – áńgimeniń ózi, ol barlyq amerıkalyq bızneske Aq úıdiń Qazaqstanmen yntymaqtastyqty qoldaıtyny týraly belgi. AQSh-tyń qazirgi tarıhynda saıasat buryn-sońdy amerıkalyq korporatsııalardyń kóńil kúıine mundaı áser etpegen bolar, - dedi saıasattanýshy.
Azamat Baıǵalıevtiń atap ótýinshe, Memleket basshysynyń Nıý-Iorktegi bıylǵy saparyndaǵy kezdesýleri Qazaqstannyń, Prezıdenttiń óziniń Eýrazııa aýmaǵynda róli nyǵaıyp kele jatqanyn tanytyp otyr. Eki el basshylarynyń kezdesýi Qazaqstan álemdik ortalyqtardyń bárimen — AQSh-pen de, Qytaımen de, eýropamen de, arab álemimen de birdeı baılanys ustaı beretinin kórsetti.
Eske sala ketsek, AQSh prezıdenti Donald Tramp Qazaqstannyń Memleket basshysyn tarıhı kelisimmen quttyqtady. Bul týraly Donald Tramp Truth Social áleýmettik jelisinde jazdy.