Qazaqstan AQSh-qa Almatydan 49 jylǵa jalǵa jer beredi

ASTANA. KAZINFORM — Májilis Almaty qalasynda «AQSh-tyń konsýldyq mekemesiniń úı-jaıyn salý úshin jer ýchaskesin jalǵa berý týraly kelisimdi ratıfıkatsııalaý týraly» zań jobasyn qabyldady.

— Memleket basshysy 2019 jyly BUU-nyń bas assambleıasynyń 74 sessııasyna qatysý qorytyndysy boıynsha Almaty qalasynda AQSh konsýldyǵy mekemesin salý úshin jer berý týraly tapsyrma berdi. Prezıdent tapsyrmasyn oryndaý maqsatynda Nıý-Iorkte 2024 27 qyrkúıekte kelisimge qol qoıyldy. Kelisimniń maqsaty — AQSh úkimetine 7,5 gektar (70 593 sharshy metr), ıaǵnı Jamaqaev kóshesi, ál-Farabı dańǵyly, S. Seıfýllın dańǵyly jáne Aldarkóse kóshesiniń arasynda ornalasqan jer ýchaskesin 49 jalǵa berý. AQSh úkimet kelisim kúshine engen kúnnen bastap 30 kúnniń ishinde jerdi jalǵa alý aqysyn bir jolǵy tólemmen 25 301 016  mln AQSh dollaryn tóleıdi, — dedi Syrtqy ister mınıstriniń birinshi orynbasary Aqan Rahmettýlın Májilistiń jalpy otyrysynda.

Onyń aıtýynsha, atalǵan kelisim Qazaqstan men AQSh arasynda strategııalyq yntymaqtastyqty nyǵaıtýdy kózdeıdi. 

— Kelisimniń kúshine enýi Qazaqstannyń saıası jáne praktıkalyq múddesine sáıkes keledi. Birinshiden, atalǵan jer ýchaskesin jalǵa berý kelisiminiń arqasynda Qazaqstanǵa AQSh-tyń San-Frantsısko qalasynda elimizdiń bas konsýldyǵyn ashýǵa ruqsat berdi. Ekinshiden, AQSh tarapymen aldyn ala kelisilgendeı atalǵan zań jobasy ratıfıkatsııalanǵannan keıin AQSh tarapy Hıýstonda (Tehas shtaty) taǵy bir Qazaqstan konsýldyǵyn ashýǵa ruqsat beredi. Úshinshiden, jańa bas konsýldyqtyń qurylysy onyń qyzmetiniń ulǵaıýyna, bıznestiń damýyna, qala ınfraqurylymynyń damýyna jáne uzaqmerzimdi perspektıvada jańa jumys oryndarynyń ashylýyna yqpal etedi. Tórtinshiden, amerıkalyq jáne basqa da halyqaralyq kompanııalar úshin tartymdy ınvestıtsııa, — deıdi ol.

Aıta ketelik AQSh Qazaqstanǵa qatysty «Djekson-Venık» túzetýlerin joıý týraly zań jobasyn qaraıdy.