Qazaqstan akrobattary X Azııa chempıonatynda top jardy
ALMATY. QazAqparat - Almatyda sporttyq akrobatıka boıynsha X Azııa chempıonatynda Qazaqstan quramasy birinshi oryndy ıelendi, dep habarlaıdy QazAqparat tilshisi qalalyq aqparattyq-sport habyna silteme jasaı otyryp.
«№ 9 Olımpıadalyq rezervtegi mamandandyrylǵan balalar-jasóspirimder mektebinde» sporttyq akrobatıkadan X Azııa chempıonaty aıaqtaldy.
Birinshilik úsh jas sanatynda ótkizildi: úlkender, 11-16 jas aralyǵyndaǵy jetkinshekter jáne 12-18 jas aralyǵyndaǵylar. Baıraqty básekede Qazaqstan, Ózbekstan, Tájikstan, Qytaı, Úndistan, Iran, Soltústik Koreıa jáne Gonkong elderinen kelgen 144 sportshy úsh kún boıy kúsh synasty.
Sary qurlyq básekesi Qazaqstanda osymen besinshi ret ótkizildi. Azııa birinishiligi Qazaqstanda akrobatıkany damytý maqsatynda uıymdastyryldy.
Jarys qorytyndysy boıynsha jalpykomandalyq esep boıynshaQazaqstan quramasy birinshi orynǵa jaıǵasa, Ózbekstan sportshylary ekinshi oryndy ıelendi. Al úzdik úshtikti Qytaı komandasy túıindedi.
- Barlyǵy joǵarǵy deńgeıde ótti. Bizdiń komanda osyndaı baıraqty básekede alǵa ozyp, jeńiske jetkenine asa qýanyshtymyn. Biz komandalyq jarystardan úsh kýbokty ıelendik. Aıtýly dodanyń medal men dıplomdarynyń basym bóligi bizdiń komanda qorjynynda. Árıne, biz úshin bul naǵyz jetistik, qýanyshymyzdy sózben jetkizý múmkin emes, osyndaı nátıje kórsetken elimizdiń sportshylaryn maqtan tutamyn,- dedi Qazaqstan quramasynyń sportshysy Dıas Baltybaev.
Chempıonat jeńimpazdary men júldegerleri dıplom, medal,jáne kýboktarmen marapattaldy.
Jarys Deneshynyqtyrý jáne sport komıteti, Qazaqstannyń mádenıet jáne sport mınıstrligi, Almaty qalasy ákimdigi, «Qazaqstannyń gımnastıka federatsııasy» jáne «Almaty qalasy gımnastıka federatsısy» qaýymdastyqtarynyń qoldaýymen ótkizildi.
