Qazaqstan aqpanda Germanııaǵa 20 myń tonna munaı jetkizedi

ASTANA. QazAqparat – Aqpan aıynyń birinshi jartysynda Qazaqstan Germanııaǵa munaı eksportynyń alǵashqy partııasyn jetkizedi. Bul týraly QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Munaı tasymaldaý tehnıkalyq turǵydan problema emes. Búgin Reseı Federatsııasynyń Energetıka mınıstrligindegi áriptesterimmen sóılestim. Munaı jetkizý tehnıkalyq qaıta baǵyttaý jáne marshrýttarǵa baılanysty. Aqpan aıynda munaıdy jetkizýdi júzege asyramyz. Ázirge birinshi partııa - 20 myń tonna», - dedi Bolat Aqsholaqov mınıstrliktiń keńeıtilgen alqa otyrysynan keıin BAQ ókilderiniń saýalyna jaýap berip.

Onyń aıtýynsha, munaı jetkizý aqpannyń birinshi jartysyna josparlanyp otyr.

Aıta keteıik, buǵan deıin «QazTransOıl» AQ 2023 jyldyń birinshi toqsanynda Germanııa Federatıvti Respýblıkasyna 300 myń tonna kóleminde munaı tasymaldaıtyny týraly aıtylǵan edi.

Sondaı-aq Bolat Aqsholaqov Germanııaǵa jylyna 6 mln tonnaǵa deıin munaı eksporttaı alatyndyǵymyz týraly málim etken.