Qazaqstan «aqyldy fermalar» dáýirine qadam basty – Toqaev EAEO agroónerkásibin tsıfrlandyrýdy usyndy
ASTANA. KAZINFORM – Memleket basshysy Qasym-Jomart Toqaev Joǵary Eýrazııalyq ekonomıkalyq keńestiń otyrysynda EAEO elderiniń ónerkásibi men agroónerkásiptik keshenin tsıfrlyq transformatsııalaý qajettigin aıtty.
Prezıdenttiń aıtýynsha, ekonomıkany tsıfrlandyrý – tehnologııalyq trendke ilesý ǵana emes, básekege qabilettiliktiń negizgi faktory. Qazaqstan bul mindetke júıeli túrde qarap, aýqymdy tsıfrlyq transformatsııa tujyrymdamasyn iske qosty. Ónerkásip sektoryndaǵy jáne taý-ken metallýrgııa keshenindegi robottandyrý, bultty sheshimder men iri kásiporyndardyń tsıfrlyq syńarlary ónimdilikti arttyryp, shyǵyndardy azaıtqan.
– Al aýyl sharýashylyǵyn avtomattandyrý ónimdiliktiń artýyna, sý resýrstaryn únemdeýge jáne ekologııaǵa túsetin júktemeni azaıtýǵa yqpal etedi. Mal sharýashylyǵynda qaǵaz qujat aınalymyn boldyrmaıtyn ári eseptiń naqtylyǵyn arttyratyn tsıfrlyq júıeler engizilip jatyr. Qazirdiń ózinde avtomattandyrylǵan saýý, jemdeý jáne mıkroklımatty baqylaý júıelerimen jabdyqtalǵan 650-den astam «aqyldy ferma» jumys isteıdi, – dep atap ótti Q.Toqaev elordada Táýelsizdik saraıyndaǵy otyrysta.
Ósimdik sharýashylyǵynda, sonyń ishinde tuqym sharýashylyǵynda «egistikten dastarqanǵa deıin» qaǵıdatymen ónimdi qadaǵalaý júıesi engizilip jatyr. Tsıfrlyq josparlaý men boljaý tehnologııalarynyń arqasynda Qazaqstan ekinshi jyl qatarynan rekordtyq kólemde – 27 mln tonna deńgeıinde astyq jınap otyr.
Sonymenm birge, Prezıdent aýyl sharýashylyǵy alqaptaryn tolyq tsıfrlandyrý, agrodrondardy, spýtnıktik navıgatsııa men meteoderekterdi qoldaný aıasyn keńeıtý jumystaryn atap ótti. Jerdi paıdalanýǵa berý protsesi elektrondy formatqa kóshirilip jatyr. Al agrarshylardy memlekettik qoldaý sharalary tolyq tsıfrlandyrylady. Bul sybaılas jemqorlyq qaterin azaıtýǵa múmkindik beredi.
– Aýyl sharýashylyǵyn tsıfrlandyrý tájirıbesin keńinen taratýǵa jáne EAEO aıasyndaǵy joǵary tehnologııalyq bastamalardy qoldaýǵa kúsh salý qajet. Agroónerkásip keshenindegi kooperatsııalyq jobalardy qarjylaı qoldaýǵa qatysty EAEO týraly shartqa engiziletin túzetýlerdiń mańyzy erekshe. Mundaı tehnologııalyq bastamalardy aýqymdy qarjylandyrý úshin Eýrazııalyq damý banki áleýetin tolyq paıdalaný qajet. Jıyrma jylda bank eýrazııalyq ıntegratsııanyń tıimdi quraly retinde ózin dáleldedi. Eýrazııalyq damý banki aldaǵy ýaqytta da odaq aıasyndaǵy strategııalyq jobalardy iske asyrýdyń negizgi qozǵaýshy kúshteriniń biri bolyp qalýy qajet, – dedi Prezıdent.
Aıta keteıik, Astanada Joǵary Eýrazııalyq ekonomıkalyq keńestiń otyrysy bastaldy. Bul jıynǵa Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan keldi.
Bıyl Qazaqstan Respýblıkasy EAEO organdaryna tóraǵalyq etip otyr. Memleket basshysy Qasym-Jomart Toqaev 2025 jylǵy 31 jeltoqsanda EAEO memleketteri basshylaryna joldaǵan úndeýinde Qazaqstan tóraǵalyǵynyń negizgi basymdyqtaryn aıqyndady.
Olar: jasandy ıntellektini ekonomıkalyq ıntegratsııany damytýdyń jańa quraly retinde damytý, EAEO logıstıkalyq keńistiginiń áleýetin paıdalaný, ónerkásip pen agroónerkásip keshenin tsıfrlandyrý, ózara saýdadaǵy ákimshilik kedergilerdi qysqartý jáne úshinshi eldermen ekonomıkalyq yntymaqtastyqty keńeıtý.
