Qazaqstan Akademııasy Grekııada jańa bilim berý jobalaryn bastaıdy
ASTANA. KAZINFORM — Qazaqstan Respýblıkasy Bas prokýratýrasy janyndaǵy Quqyq qorǵaý organdary akademııasynyń rektory Nurǵalym Ábdirov Grekııaǵa jumys sapary barysynda Eýropalyq jarııa quqyq uıymy (EPLO) Dırektorlar keńesiniń otyrysyna qatysyp, EPLO basshylyǵymen jáne Eýropalyq quqyq jáne basqarý ýnıversıtetiniń (ELGU) ókilderimen kelissózder júrgizdi.
EPLO – jarııa quqyq, quqyq ústemdigi jáne kásibı kadrlar daıarlaý salasynda memleketterdi, ýnıversıtetter men ǵylymı ınstıtýttardy biriktiretin halyqaralyq uıym.
Kezdesýlerdiń qorytyndysy boıynsha Akademııa EPLO-men Ózara túsinistik týraly memorandýmǵa, al ELGU-men Yntymaqtastyq týraly kelisimge qol qoıdy. Qujattar birlesken bilim berý, ǵylymı-zertteý jáne saraptamalyq jobalardy damytýǵa baǵyttalǵan.
Negizgi nátıjelerdiń biri – Akademııa bazasynda EPLO Óńirlik ortalyǵyn qurý týraly ýaǵdalastyqqa qol jetkizý boldy. Ortalyq birlesken zertteýler júrgizýge, halyqaralyq jáne granttyq jobalarǵa qatysýǵa, sondaı-aq quqyq qorǵaý jáne memlekettik organdar qyzmetkerlerin daıarlaý jáne qaıta daıarlaýǵa baǵyttalatyn bolady.
Kezdesý barysynda qazirgi zamanǵy quqyq qorǵaý qyzmeti úshin tikeleı mańyzy bar baǵyttarǵa – kıberqaýipsizdikke, jasandy ıntellektini qoldanýǵa jáne transulttyq uıymdasqan qylmysqa qarsy is-qımylǵa erekshe nazar aýdaryldy.
ELGU-men yntymaqtastyq aıasynda qos dıplomdy bilim berý baǵdarlamalaryn, akademııalyq utqyrlyqty jáne taǵylymdamalardy qamtıtyn birlesken bilim berý baǵdarlamalary kelisildi. Akademııanyń 20 magıstranty men doktorantyn taǵylymdamadan ótkizý týraly ýaǵdalastyqqa qol jetkizildi. Sonymen qatar taraptar birlesken zertteý toptaryn qurý jáne Akademııa bazasynda ELGU fılıalyn ashý múmkindigin qarastyrdy.
Bul kelisimder Akademııanyń halyqaralyq yntymaqtastyǵyn birlesken zertteýler men bilim berý baǵdarlamalaryn iske asyrý, tájirıbe almasý, taǵylymdamalar uıymdastyrý jáne sheteldik saraptamany tartý arqyly praktıkalyq baǵytta damytýǵa múmkindik beredi.
Aıta ketelik Qazaqstanda halyqaralyq quqyq qaýymdastyǵynyń bólimshesi ashyldy.
