Qazaqstan akademııalyq hab quryp jatyr - Prezıdent
ASTANA. KAZINFORM – Memleket basshysy Qasym-Jomart Toqaev Astanada ótip jatqan «Connested-2024» halyqaralyq konferentsııasyna qatysýshylarǵa joldaǵan quttyqtaýynda bilim, ınnovatsııa salasyndaǵy yntymaqtastyqtyń mańyzyna toqtaldy.
Bilim-ǵylym men ınnovatsııa, tsıfrlandyrý jáne ekologııa máselelerin talqylaýǵa arnalǵan is-sharada Premer-mınıstrdiń orynbasary Tamara Dúısenova Prezıdenttiń konferentsııa qatysýshylaryna joldaǵan quttyqtaýyn oqydy.
«Qazir álemde jańa tehnologııalar men jasandy ıntelektiniń qarqyndy damýyna, aýa raıynyń jáne qýat kózderiniń ózgerýine baılanysty aýqymdy syn-qaterler paıda bolýda. Osy rette memleketterdiń jan-jaqty jáne turaqty órkendeýi úshin bilim jáne ǵylym men ınnovatsııa salalaryndaǵy yntymaqtastyqty ulǵaıtýdyń mańyzy zor. Sol sebepti Qazaqstan sheteldiń bedeldi joǵary oqý oryndarymen birlese otyryp akademııalyq hab qurý jolynda belsendi jumys júrgizip keledi», - deıdi Prezıdent.
Qasym-Jomart Toqaev atalǵan qadamdar Qazaqstannyń ǵylymı-ınnovatsııalyq áleýetin arttyrýdyń berik negizin qalyptastyryp jatqanyn atap ótti.
«Connested-2024 konferentsııasy osy maqsatqa jetýge septigin tıgizedi. Búgingi basqosý ǵalymdar men sarapshylardyń halyqaralyq baılanysyn bekemdeýge, bilim berý jáne adam kapıtalyn damytý salasyna tyń tásilder ashýǵa jol ashady dep senemin», - delingen quttyqtaýda.
Aıta ketý kerek, bıyl alǵash ret uıymdastyrylyp otyrǵan halyqaralyq is-sharaǵa álemniń 60 elinen 300-ge jýyq halyqaralyq deńgeıdegi sarapshylar shaqyrylǵan.
