Qazaqstan Aqaba protsesin joǵary baǵalaıdy — Qasym-Jomart Toqaev
ASTANA. KAZINFORM — Qazaqstan Iordanııanyń Taıaý Shyǵystaǵy beıbitshilik pen turaqtylyqty nyǵaıtýǵa baǵyttalǵan bastamalaryn joǵary baǵalaıdy. Bul týraly Memleket basshysy Qasym-Jomart Toqaev Iordanııa Korolimen kezdesýde aıtty.
Memleket basshysy eki eldiń halyqaralyq jáne óńirlik kún tártibindegi ózekti máselelerdi sheshý tásilderi uqsas ekenine nazar aýdaryp, Iordanııa Koroliniń dostyq baılanystardy nyǵaıtyp, qos halyqty jaqyndastyrýǵa qosqan úlesin joǵary baǵalady.
Sonyń ishinde Prezıdent ІІ Abdalla ben ál-Hýseın bastamashy bolǵan Aqaba protsesin erekshe atap ótti.
— Sizdiń kóregen basshylyǵyńyzben Iordanııa parasattylyq ári baıyptylyq úlgisin kórsetip, halyqaralyq arenada Taıaý Shyǵys jáne odan tysqary aımaqtardaǵy beıbitshilik pen turaqtylyqtyń dáıekti jaqtaýshysy retinde keńinen tanyldy. Osy oraıda, Qazaqstan Ózińiz on jyldan asa ýaqyt buryn bastaǵan Aqaba protsesin joǵary baǵalaıdy. Mundaı formattaǵy kezdesýge Ortalyq Azııada alǵash ret uıymdastyrýshylardyń biri retinde qatysý — biz úshin úlken mártebe. Sessııa búginde asa ózekti sanalatyn jasandy ıntellekt salasyndaǵy qaýipsizdik taqyrybyna arnalyp otyr. Sammıt Ortalyq Azııa óńiriniń ustanymyn bildirip, beıbitshilik pen qaýipsizdikti saqtaý jónindegi birlesken kúsh-jigerimizge tyń serpin syılaıtynyna senimdimin, — dedi Prezıdent.
Aıta keteıik, 6 qarasha kúni Astanada Aqaba protsesi sammıti ótedi. Aqaba protsesi — 2015 jyly Iordanııa koroli ІІ Abdalla bastamashy bolǵan halyqaralyq bastama. Onyń basty maqsaty — terrorızmge, ekstremızmge jáne transulttyq qylmysqa qarsy kúreste memleketter arasyndaǵy yntymaqtastyqty nyǵaıtý.
Búgin Prezıdent Qasym-Jomart Toqaevtyń shaqyrýymen Qazaqstanǵa Iordan Hashımıt Koroldiginiń Koroli II Abdalla ben ál-Hýseın resmı saparmen keldi. Astana áýejaıynda Iordanııa Korolin Memleket basshysynyń ózi kútip aldy.
Aqordada Qazaqstan Prezıdenti Qasym-Jomart Toqaev pen Iordanııa Koroli ІІ Abdalla ben ál-Hýseın kelissóz júrgizdi.
