Qazaqstan Aq úıdiń Izraıl men HAMAS arasyndaǵy beıbitshilik bastamasyn qoldaıdy - SІM
ASTANA. KAZINFORM - Qazaqstan Respýblıkasy Syrtqy ister mınıstrligi AQSh-tyń Taıaý Shyǵystaǵy ahýaldy turaqtandyrý jónindegi bastamasyna qatysty túsinikteme berdi.
Qazaqstan halyqaralyq qaýymdastyqtyń Taıaý Shyǵystaǵy ahýaldy turaqtandyrýǵa baǵyttalǵan kúsh-jigerin barynsha qoldaıdy.
«Aq úıdiń Izraıl men HAMAS arasyndaǵy atysty toqtatý, kepilge alynǵan adamdardy bosatý, gýmanıtarlyq kómekti qamtamasyz etý, sondaı-aq halyqaralyq qoǵamdastyqtyń qoldaýymen Gaza sektoryn qalpyna keltirý jaıly negizgi erejelerden turatyn beıbitshilik bastamasyn quptaımyz.
Usynylǵan sharalar júzege asyrylǵan jaǵdaıda, olar beıbit turǵyndardyń qazasy men qurbandar sanyn toqtatýǵa múmkindik beredi, sondaı-aq óńirde beıbitshilik ornaýynyń alǵysharty bola alady degen úmit bildiremiz», — dep jazdy vedomstvodan.
Elimizdiń SІM uzaq jylǵa sozylǵan qaqtyǵystyń jalǵyz sheshimi retinde «eki halyq úshin eki memleket» formýlasy negizinde astanasy Shyǵys Ierýsalım dep belgilengen Palestına memleketin qurý týraly Qazaqstannyń myzǵymas ustanymyn rastaǵan.
