Qazaqstan Air Products kompanııasyna munaı-gaz hımııasy jáne kómir hımııasyn damytýdy usyndy
ASTANA. KAZINFORM – Energetıka vıtse-mınıstri Sanjar Jarkeshov Air Products kompanııasynyń Eýropa jáne Afrıka boıynsha prezıdenti Iva Bolspen kezdesý ótkizdi. Basqosý barysynda Qazaqstan aýmaǵynda ınvestıtsııalyq jobalardy júzege asyrý jáne josparlardy talqylaý júrgizildi.
Kompanııa ókilderi munaı-gaz jáne munaı-hımııa salasyndaǵy jobalaryn tanystyrdy, onyń ishinde ilespe gazdy óńdeý jobalary bar. Bul baǵyttar salany damytýdyń ulttyq basymdyqtaryna sáıkes keletindikten, áleýetti qyzyǵýshylyq týdyratyny aıtyldy.
Energetıka mınıstrligi gaz salasynyń turaqty jumys isteýi men resýrstyq bazanyń senimdiligin qamtamasyz etý mańyzdy ekenin atap ótti. Ásirese Qashaǵan ken ornynan alynatyn shıki gazdy tıimdi paıdalaný jáne ishki naryqty taýarlyq gazben qamtamasyz etý basymdyq retinde qarastyryldy.
Kezdesý barysynda 2025 jyldan bastap North Caspian Operating Company operatory men Air Products kompanııasy arasynda Qashaǵan jobasy aıasynda 6 mlrd tekshe metrge deıin ilespe gazdy óńdeý múmkindigi boıynsha kelissózder júrgizilip jatqany habarlandy. Mınıstrlik bul bastamalardyń memlekettik organdarmen úılestirilýi qajet ekenin atap ótti.
Sonymen qatar Teńiz ken ornynyń qolda bar óndiristik qýattaryn Qashaǵan jobasyn odan ári damytý maqsatynda paıdalaný tujyrymdamasynyń ázirlený barysy qaraldy. Operatordyń baǵalaýynsha, bul tásil kapıtaldyq shyǵyndardy azaıtý turǵysynan tıimdi bolýy múmkin.
Energetıka mınıstrligi Air Products kompanııasynyń «QazMunaıGaz» jáne «QazaqGaz» ulttyq kompanııalarymen ártúrli yntymaqtastyq formattaryn qarastyrýǵa daıyn ekenin bildirdi.
Kezdesý qorytyndysynda taraptar Qazaqstannyń munaı-gaz hımııasy salasyn damytýǵa baǵyttalǵan jobalardy iske asyrý jáne yntymaqtastyqty nyǵaıtýǵa ózara múddelilik tanytty. Qazaqstan Respýblıkasynyń Energetıka mınıstrligi ınvestıtsııalyq bastamalardy júzege asyrý máseleleri boıynsha halyqaralyq seriktestermen ashyq ári syndarly dıalogqa daıyn ekenin jetkizdi.
Budan buryn energetıka kásiporyndarynyń qyzmetkerlerine jeńildetilgen ıpoteka beriletinin jazǵan edik.
