Qazaqstan AIIB quryltaıshy-múshesine aınalady - Senat
ASTANA. QazAqparat - Búgin Parlament Senatynyń jalpy otyrysynda «Azııa Infraqurylymdyq Investıtsııalar Banki Kelisiminiń baptaryn ratıfıkatsııalaý týraly» QR Zańy qabyldandy. Azııa Infraqurylymdyq Investıtsııalar Banki (AIIB) týraly kelisim 2015 jyly 29 maýsymda Beıjińde jasalǵan bolatyn.
AIIB qyzmetiniń negizgi baǵyty ınfraqurylymǵa jáne basqa da óndiristik sektorǵa ınvestıtsııalar salý jolymen Azııadaǵy ekonomıkalyq damýǵa, ál-aýqatty jaqsartýǵa jáne ınfraqurylymnyń ózara is-qımylyn jaqsartýǵa járdemdesý bolyp tabylady. Qazaqstandy qosa alǵanda Banktiń quryltaıshysy elý jeti memleket bolyp tabylady. Onyń ishinde otyz jetisi azııalyq, jıyrmasy óńirlik emes elder bolyp tabylady. Al iri aktsıonerleri - Qytaı, Reseı men Úndistan.
«Banktiń jarǵylyq kapıtaly 100 mlrd. AQSh dollaryn quraıdy jáne tólenetin aktsııalardan (20 mlrd) jáne talap etý boıynsha tóleýge jatatyn aktsııalardan (80 mlrd) turady. Bank kapıtalynyń óńirlik músheleriniń úlesi 75 paıyzdy, óńirlik emes músheleriniń úlesi 25 paıyzdy quraıdy. Sol arqyly sheshýshi daýys berý quqyǵy azııalyq elderde qalady. Shtab-páteri Beıjińde ornalasady», - deıdi Ulttyq ekonomıka mınıstri Erbolat Dosaev.
Onyń aıtýynsha, kelisim kúshine engen sátten bastap Qazaqstan Respýblıkasy Banktiń quryltaıshy múshesine aınalady jáne ózine Kelisimde kózdelgen mindettemelerin alady.
Bank kapıtalynyń bólinýine sáıkes, Qazaqstannyń Bank kapıtalyndaǵy jalpy úlesi 729,3 mıllıon AQSh dollaryn nemese 0,7 paıyzdy quraıdy. Tólenetin kapıtal 145,9 mıllıon dollaryn qurap, ol 5 transhpen 29,2 mln. AQSh dollary mólsherinde jyl saıyn tólenetin bolady. AIIB kapıtalyn bólýge sáıkes, Qazaqstannyń úlesi 37 óńirlik múshe memelketter arasynda 17-i oryn alady.
Tutastaı alǵanda, álemdegi qıyn ekonomıkalyq jaǵdaı aıasynda osy kelisimdi ratıfıkatsııalaý Qazaqstanǵa Bank arqyly ınfraqurylymdyq jobalardy uzaqmerzimdi jáne qolaıly kredıttik resýrstar tartýǵa múmkindik beredi. Bul ekonomıkanyń damýyna jáne Azııadaǵy óńirlik ıntegratsııa deńgeıin arttyrýǵa oń áserin tıgizedi.
Parlament qabyldaǵan zań Memleket basshysynyń qol qoıýyna joldanady.
