Qazaqstan AI-ekonomıkanyń barlyq bes deńgeıin damytýdy kózdeıdi – Jaslan Mádıev
ASTANA. KAZINFORM – Qazaqstan jasandy ıntellektiniń energetıkalyq jáne chıptik ınfraqurylymnan bastap, úlken tildik modelder men qoldanbaly sheshimderge deıingi barlyq bes deńgeıin júıeli túrde damytýdy kózdep otyr.
Bul týraly QR Premer-mınıstriniń orynbasary – jasandy ıntellekt jáne tsıfrlyq damý mınıstri Jaslan Mádıev AI and Digital Bridge forýmy aıasyndaǵy paneldik sessııada málimdedi.
Jaslan Mádıevtiń aıtýynsha, jasandy ıntellekt tehnologııalarynyń damýy qazir bastapqy kezeńde tur. Sondyqtan Qazaqstan úshin AI-ekonomıkanyń tutas júıesin qalyptastyrý mańyzdy.
– Qazir biz jasandy ıntellekt tehnologııalarynyń damýynyń eń bastapqy kezeńinde turmyz. Ártúrli baǵalaýlarǵa sáıkes, AI-dyń jalpy áleýetti naryǵynyń kólemi qazirdiń ózinde 50 trıllıon dollardan asady, – dedi mınıstr.
Ol Qazaqstan jasandy ıntellekt ekonomıkasynyń bes negizgi deńgeıin qatar damytýdy kózdeıtin júıeli tásildi tańdaǵanyn atap ótti.
– Olar – energetıkalyq ınfraqurylym, chıpter, túrli bultty platformalarǵa qoljetimdilik, jergilikti jáne egemendi úlken tildik modelderdi qosa alǵanda, úlken tildik modelderdi ázirleý, sondaı-aq qoldanbaly sheshimder deńgeıi, – dep túsindirdi Jaslan Mádıev.
Mınıstrdiń sózinshe, qazirgi ýaqytta bolashaqta osy deńgeılerdiń qaısysynda qosylǵan qunnyń eń joǵary kólemi qalyptasyp, tabystylyq kórsetkishteri joǵary bolatynyn naqty anyqtaý qıyn.
– Sondyqtan Qazaqstan jasandy ıntellekt bolashaqta ekonomıkalyq qyzmet pen bıznestiń qalypty bóligine aınalǵan kezde jańa múmkindikterdi jiberip almaý úshin barlyq bes deńgeıdi damytý jolyn tańdady, – dep túsindirdi mınıstr.
Jaslan Mádıev jasandy ıntellekt salasyndaǵy egemendikke umtylý barlyq qajetti tehnologııany óz betinshe ázirleý degendi bildirmeıtinin atap ótti.
– Basqa eldermen jáne álemniń túkpir-túkpirindegi iri tehnologııalyq kompanııalarmen yntymaqtastyq ornatyp, sonymen qatar ártaraptandyrylǵan tásildi saqtaý mańyzdy, – dedi ol.
Mınıstrdiń aıtýynsha, Qazaqstan ázirge chıp óndirýshi el emes. Degenmen, asa mańyzdy tehnologııalarǵa qol jetkizý úshin batys jáne shyǵys elderindegi seriktestermen qarym-qatynasty damytý qajet.
– Asa mańyzdy tehnologııalarǵa qol jetkizý úshin eksporttyq baqylaýǵa jaýapty retteýshi organdarmen jáne vedomstvolarmen jaqsy qarym-qatynasty saqtaýymyz kerek, – dedi Jaslan Mádıev.
Mınıstr úlken tildik modelder men bultty sheshimderdi damytý máselesine de erekshe toqtaldy. Onyń aıtýynsha, mundaı tehnologııalardy ázirleý kezinde qazaqstandyq kontent pen mádenı konteksti eskerý qajet.
– Bul modelderdi qalaı oqytý jáne qosymsha oqytý kerektigin túsinip, tıisti quzyretterdi damytýymyz qajet. Sondyqtan qoldanbaly sheshimder deńgeıine ótýge múmkindik beretin áleýetti arttyrý baǵdarlamalary kerek, – dep atap ótti ol.
Jaslan Mádıevtiń pikirinshe, Qazaqstan jasandy ıntellektiniń qoldanbaly deńgeıinen eń úlken praktıkalyq paıda kóre alady.
– Bizdiń paıymdaýymyzsha, Qazaqstan eń úlken paıdaǵa qoldanbaly sheshimder deńgeıinde qol jetkize alady. Mundaı sheshimderdi búkil ekonomıkaǵa jáne adamdardyń kúndelikti ómirine keńinen engizýge bolady, – dep túıindedi mınıstr.
Buǵan deıin, Qazaqstanda JI-di óndiriste qalaı qoldanýǵa bolatynyn jazǵanbyz.
