Qazaqstan AI & Digital Bridge forýmyn ótkizýge qansha qarjy jumsady
ASTANA. KAZINFORM – Astana Hub uıymdastyratyn iri is-sharalardy qarjylandyrýdyń negizgi kózderi – demeýshiler, jarnama kelisimderi jáne IT-kompanııalardyń ınvestıtsııasy. Bul týraly Jasandy ıntellekt jáne tsıfrlyq damý vıtse-mınıstri Bahtııar Muhametqalıev Úkimettegi brıfıngte AI & Digital Bridge forýmyna qatysty jýrnalısterdiń suraǵyna jaýap bere otyryp aıtty.
Jýrnalıster forýmdy ótkizýge qansha qarajat jumsalatynyn jáne onyń qandaı kózderden qarjylandyrylatynyn surady.
Bahtııar Muhametqalıevtiń aıtýynsha, mundaı is-sharalardy qarjylandyrýdyń álemde qalyptasqan modeli bar. Onyń aıasynda kompanııalar forým alańynda óz ónimderin tanystyrý úshin stendter ornalastyrady, sondaı-aq jarnamalyq kelisimder jasalady.
– Kompanııa forýmǵa kelip, óz ónimin kórsete alady. Onyń stendi neǵurlym úlken bolsa, alatyn keńistigi de soǵurlym kóp bolady jáne sáıkesinshe onyń quny ózgeredi. Budan bólek, jarnamalyq kelisimder bar. Іri IT-kompanııalar da belsendi túrde qarjy salady, – dedi vıtse-mınıstr.
Onyń aıtýynsha, forýmdaǵy jarnamalar, beınerolıkter men iri stendterdi kompanııalardyń ózderi qarjylandyrady.
Vıtse-mınıstr AI & Digital Bridge forýmyn uıymdastyrýǵa jumsalǵan naqty somany aıta almaıtynyn atap ótti.
– Qazir naqty qansha turatynyn aıta almaımyn. Shynyn aıtqanda, bilmeımin. Mundaı is-sharany joǵary deńgeıde ótkizý úshin qomaqty qarajat qajet. Biraq, menińshe, ol naqty kelisimsharttar arqyly óteledi, – dedi ol.
Bahtııar Muhametqalıevtiń aıtýynsha, Astana Hub memlekettik organ emes. Sonymen qatar qazir uıym ózin-ózi aqtaý deńgeıine jetip, mınıstrlikten is júzinde qarjy almaıdy.
– Astana Hub ınvestorlar men jarnama berýshilerdi tartyp, osyndaı iri is-sharalardy uıymdastyrady. Bul sharalarǵa azamattar men jastar qatysady, túrli baıqaýlar ótkiziledi, – dedi vıtse-mınıstr.
Ol mundaı is-sharalardyń negizgi maqsaty Qazaqstandaǵy startaptar ekojúıesin jáne adamı kapıtaldy damytý ekenin atap ótti.
Aıta keteıik, AI & Digital Bridge forýmynda qandaı kelisimder men memorandýmdarǵa qol qoıylǵanyn jazǵanbyz.
