Qazaqstan AHQO alańy arqyly AQSh-pen ınvestıtsııalyq yntymaqtastyqty arttyrady

NUR-SULTAN. QazAqparat - Qazaqstan Respýblıkasynyń Premer-Mınıstri Asqar Mamın AQSh Halyqaralyq damý qarjy korporatsııasynyń (DFC) bas atqarýshy dırektory Adam Bolermen kelissóz júrgizdi, dep habarlaıdy QazAqparat Úkimet basshysynyń resmı saıtyna silteme jasap.

Taraptar AÓK, týrızm, logıstıka, ınfraqurylym, sondaı-aq qarjy jáne tehnologııalar salalaryndaǵy ınvestıtsııalyq yntymaqtastyqty damytý perspektıvalaryn talqylady. Bul rette Qazaqstan Respýblıkasy ekonomıkasynyń jeke sektoryn damytýǵa baǵyttalǵan jobalar men bastamalardy birinshi kezekte iske asyrý qajet ekeni atap ótildi. Kelissóz qorytyndysy boıynsha «Astana» halyqaralyq qarjy ortalyǵynyń ákimshiligi» AQ men AQSh Halyqaralyq damý qarjy korporatsııasy arasynda ınvestıtsııalyq yntymaqtastyq týraly kelisimge qol qoıyldy. Qujat Qazaqstan Respýblıkasynda $1 mlrd deıingi somaǵa AHQO platformasy arqyly birlesken ınvestıtsııalyq jobalardy iske asyrýdy kózdeıdi. AQSh-tyń Halyqaralyq damý qarjy korporatsııasy Amerıka Qurama Shtattarynyń damý ınstıtýty, ol shetelde jeke jobalardy qarjylandyrýdy qamtamasyz etýge jáne qoldaýǵa jaýapty. DFC 2019 jylǵy 20 jeltoqsanda Sheteldik jeke ınvestıtsııalar korporatsııasynyń (OPIC) AQSh-tyń halyqaralyq damý agenttiginiń (USAID) Damýdy nesıelendirý basqarmasymen birigýi arqyly quryldy. Kelissózge Qazaqstan tarapynan QR Premer-Mınıstriniń birinshi orynbasary Álıhan Smaıylov, QR Strategııalyq josparlaý jáne reformalar jónindegi agenttiginiń tóraǵasy – AHQO basqarýshysy Qaırat Kelimbetov, syrtqy ister mınıstri Muhtar Tileýberdi, Amerıka tarapynan — AQSh-tyń Qazaqstandaǵy elshisi Ýılıam Mozer, DFC bas atqarýshy dırektorynyń keńesshisi Kaleb Makkarrı, DFC basqarýshy dırektory Allıson Maınor qatysty.