Qazaqstan agroónerkásip ónimderin tereń óńdeıtin óńirlik ortalyqqa aınalýdy kózdeıdi
ASTANA. KAZINFORM — Qazaqstannyń túpki maqsaty — tek aýyl sharýashylyǵyn damytyp qoımaı, elimizdi agroónerkásip ónimderin tereń óńdeıtin óńirlik ortalyqqa aınaldyrý. Bul týraly Memleket basshysy Qasym-Jomart Toqaev Sheteldik ınvestorlar keńesiniń 38-shi plenarlyq otyrysynda aıtty.
Prezıdent Qasym-Jomart Toqaevtyń aıtýynsha, biz shıkizat eksporttaýmen shektelip qalmaı, el ishinde qosylǵan quny joǵary ónim shyǵarýǵa umtylamyz. Ol úshin, eń aldymen, tamaq ónerkásibin damytýǵa, ozyq tehnologııalardy engizýge jáne ornyqty óndiristik-naryqtyq tizbekti qalyptastyrýǵa basymdyq berý ózekti. Atalǵan salada óndiristik tsıkldiń barlyq kezeńine ınvestıtsııa salýǵa mol múmkindik bar.
— Biz jasandy ıntellekt, robottandyrý tehnologııalaryn jáne Indýstrııa 4.0 sheshimderin tamaq ónerkásibine belsendi túrde engize bastadyq. JI negizinde sapany baqylaý júıesi, qural-jabdyqqa boljamdy qyzmet kórsetý tehnologııasy, avtomattandyrylǵan óndiristik jeli jáne jetkizý tizbegin ıntellektýaldy basqarý ónerkásip tıimdiligin aıtarlyqtaı arttyrady, joǵary ónim sapasy men qatań saqtalatyn halyqaralyq qaýipsizdik standarttaryna sáıkestikti qamtamasyz etedi. Sonymen qatar ıntellektýaldy logıstıka júıelerine, avtomattandyrylǵan qoıma keshenderine, muzdatqysh ınfraqurylymyna jáne zamanaýı qaptama tehnologııalaryna ınvestıtsııa salý agroónerkásip salasyndaǵy bir-birine tolyqtaı kiriktirilgen, ıaǵnı óndiristik-naryqtyq tsıfrlyq tizbekti qalyptastyrýǵa múmkindik beredi. Halyqaralyq ınvestorlardy, jetekshi azyq-túlik óndirýshilerdi, tehnologııalyq kompanııalardy jáne JI sheshimderin ázirleýshilerdi osy aýqymdy transformatsııaǵa atsalysýǵa shaqyramyz, — dep tolyqtyrdy Memleket basshysy.
Buǵan deıin Qazaqstan Azııa men Eýropany jalǵaıtyn negizgi logıstıka ortalyǵy bolýdy josparlap otyrǵanyn jazǵanbyz.
