Qazaqstan Afrıka, Taıaý Shyǵys jáne Latyn Amerıkasymen azamattyq avıatsııadaǵy seriktestikti arttyrady
ASTANA. KAZINFORM – QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva Arab azamattyq avıatsııa uıymynyń (ACAO, 21 memleket), Afrıka azamattyq avıatsııa komıssııasynyń (AFCAC, 55 memleket) jáne Latyn Amerıkasy azamattyq avıatsııa komıssııasynyń (LACAC, 22 memleket) basshylyǵymen kelissózder júrgizdi. Kezdesýlerge Qazaqstan Respýblıkasynyń IKAO janyndaǵy Turaqty ókili Tımýr Tlegenov qatysty.
AFCAC Bas hatshysy Adefýnke Adeıemı hanymmen jáne AFCAC Bas dırektory Florentın Serj Dzota myrzamen ótken kezdesýde Qazaqstan men Afrıka óńiri elderi arasyndaǵy áýe qatynasyn keńeıtý perspektıvalary, sondaı-aq tehnıkalyq yntymaqtastyqty damytý máseleleri talqylandy. Qazaqstan tarapy Afrıka memleketterimen iskerlik jáne týrıstik baılanystardy nyǵaıtýǵa múddeli ekenin jáne praktıkalyq ózara is-qımylǵa daıyndyǵyn bildirdi.
Óz kezeginde Adefýnke Adeıemı tehnıkalyq yntymaqtastyqty damytý qajettigine toqtaldy.
– AFCAC jekelegen elder boıynsha emes, kontınentaldy bolyp tabylady. Osy tásil aıasynda biz jumystyń strategııalyq 5 baǵytyn aıqyndaımyz: ınfraqurylymdy damytý, tehnıkalyq kómek, áleýetti arttyrý, ekologııalyq kún tártibi jáne áýe kóligi. Osy baǵyttardyń árqaısysy boıynsha biz túrli seriktestermen ózara is-qımyl jasaımyz, sondyqtan atalǵan bes baǵyttyń qaısysynda yntymaqtasa alatynymyzdy anyqtaý jáne praktıkalyq tehnıkalyq ózara is-qımyldy bastaý mańyzdy, - dedi A. Adeıemı.
ACAO Bas dırektory Abdennebı Manar myrza yntymaqtastyqtyń mańyzdylyǵyna toqtalyp, Qazaqstannyń baılanystyrýshy býyn retindegi joǵary tranzıttik rólin, sondaı-aq azamattardyń arab elderi baǵyttaryna degen qyzyǵýshylyǵynyń artyp kele jatqanyn atap ótti. Taraptar ushý qaýipsizdigi jáne avıatsııalyq qaýipsizdik, aeronavıgatsııa, áýe kóligin damytý, ınnovatsııalyq jáne ekologııalyq turaqty sheshimderdi engizý salasyndaǵy yntymaqtastyqty tereńdetý nıetin rastady. Sonymen qatar, adamı kapıtaldy damytýǵa, sonyń ishinde mamandar daıarlaýǵa, jastardy qoldaýǵa jáne avıatsııa salasyndaǵy áıelderdiń belsendiligin arttyrýǵa erekshe nazar aýdarylatyn bolady.
Latyn Amerıkasy azamattyq avıatsııa komıssııasynyń Prezıdenti, Domınıkan Respýblıkasy Azamattyq avıatsııa keńesiniń basshysy Ektor Porselıa myrzamen, Hatshy Haıme Bınder myrzamen jáne Azamattyq avıatsııa keńesi keńsesiniń úılestirýshisi Hıranııa Fernandes hanymmen ótken kezdesý barysynda Qazaqstan men Latyn Amerıkasy jáne Karıb óńiri elderi arasyndaǵy yntymaqtastyqty tereńdetý perspektıvalary ortaǵa salyndy.
Halyqaralyq azamattyq avıatsııanyń negizgi máseleleri boıynsha pozıtsııalardy úılestirýdi, kadrlyq áleýetti damytýdy jáne tájirıbe almasýdy qosa alǵanda, ózara is-qımyldy damytý úshin eleýli áleýet atap ótildi. Taraptar sondaı-aq ushý qaýipsizdigi, avıatsııalyq qaýipsizdik, aeronavıgatsııa, ınnovatsııalardy engizý jáne tsıfrlandyrý máselelerin talqylady.
Kezdesý qorytyndysy boıynsha IKAO standarttary men usynylatyn praktıkasyn tıimdi engizýge járdemdesý, halyqaralyq avıatsııalyq kún tártibindegi ózekti máseleler boıynsha pozıtsııalardy úılestirý, sondaı-aq halyqaralyq alańdarda ózara qoldaý kórsetý týraly ýaǵdalastyqqa qol jetkizildi.
Jalpy alǵanda, ótkizilgen kezdesýler Qazaqstannyń óńiraralyq yntymaqtastyqty keńeıtýge, ınstıtýtsıonaldyq áleýetti nyǵaıtýǵa jáne IKAO standarttary men usynylatyn praktıkasyn engizý tıimdiligin arttyrýǵa umtylysyn rastady.
