Qazaqstan Afrıka elderimen baılanysty kúsheıtýge basa mán beredi

ASTANA. KAZINFORM – Qazaqstan Afrıka elderimen baılanysty kúsheıtýge basa mán beredi. Bul týraly Aqordada Rýanda Prezıdenti Pol Kagamemen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.

— Eń aldymen shaqyrýymdy qabyl alǵanyńyz úshin Sizge rızashylyǵymdy bildirgim keledi. Sonymen qatar erteń ótetin Astana halyqaralyq forýmyna qatysý týraly sheshimińizdi joǵary baǵalaımyn. Bul shyn máninde ınklıýzıvti is-shara. Atalǵan forýmpa halyqaralyq uıymdardyń, túrli úkimetterdiń ókilderi, akademıkter, ǵylym qaıratkerleri qatysady. Sizdiń 2015 jyldyń qyrkúıeginde jasaǵan sońǵy saparyńyzdan beri Qazaqstan men Rýanda ózara qurmetke jáne damý men yntymaqtastyqtyń ortaq paıymyna negizdelgen ózara qatys-qatynas qalyptastyrýda turaqty progreske qol jetkizdi, — dedi Memleket basshysy. 

Osy oraıda Prezıdent shaǵyn quramdaǵy kelissóz barysynda ekijaqty ózara qatym-qatynastyń birqatar strategııalyq salasy talqylanyp, halyqaralyq arenadaǵy mindettemelerge qatysty pikir almasý bolǵanyn aıtty.

— Qazaqstan Afrıka elderimen baılanysty kúsheıtýge basa mán beredi. Jáne de sizdiń shyn máninde syndarly ári myqty basshylyǵyńyzben Rýanda ınstıtýtsıonaldyq turaqtylyqtyń jáne bolashaq ınnovatsııanyń modeline aınalyp otyr. Sizdiń elińizdiń ekonomıkalyq ósimi rasynda da tań qaldyrady, 8 paıyz. Bul shyn máninde jańǵyrtylǵan ekonomıka kórsetkishi», — dedi Qasym-Jomart Toqaev.

Buǵan deıin Memleket basshysy Qasym-Jomart Toqaev Aqordada Qazaqstanǵa resmı saparmen kelgen Rýanda Prezıdenti Pol Kagameni qarsy alǵanyn jazǵan edik.