Qazaqstan Afrıka elderimen saýda boıynsha yntymaqtastyqty kúsheıtpek

ASTANA. QazAqparat - Qazaqstan Respýblıkasynyń Saýda jáne ıntegratsııa vıtse-mınıstri Qaırat Tórebaev Serra-Leone Elshisi Mohamed Iongavamen kezdesti, dep habarlaıdy QazAqparat atalǵan mınıstrliktiń baspasóz qyzmetine silteme jasap.

Qazaqstan Afrıka elderimen saýda-ekonomıkalyq yntymaqtastyqty damytýǵa úlken mán beretini aıtyldy.

Qazaqstan Respýblıkasynyń Saýda jáne ıntegratsııa vıtse-mınıstri Qaırat Tórebaevtyń aıtýynsha, Qazaqstan men Serra-Leone arasyndaǵy taýar aınalymy 2022 jylǵy qańtar-qyrkúıekte 11,4 mln AQSh doll. qurady, bul ótken jyldyń sáıkes kezeńimen salystyrǵanda 398,7 ese joǵary (28,6 myń AQSh doll.). 2022 jyldyń 9 aıynda elder arasynda taýar aınalymynyń ósýi ımporttyq ónimniń ulǵaıýy esebinen baıqalady.

Óz kezeginde, Serra-Leone Elshisi Mohamed Iongavo Serra-Leone Respýblıkasynyń ımporttyq jáne eksporttyq áleýeti týraly, sondaı-aq Batys Afrıkadaǵy ıntegratsııalyq birlestikter, kólik-tranzıttik ózara is-qımyl múmkindikteri týraly habarlady.

Elshiniń aıtýynsha, aýyl sharýashylyǵy jáne taý-ken ónerkásibi Serra-Leone ekonomıkasynyń negizi bolyp tabylady.

Jalpy, taraptar saýda-ekonomıkalyq qatynastardy damytý, sondaı-aq ekijaqty jáne kópjaqty formattaǵy ózara is-qımyl boıynsha usynystar ázirleý úshin yntymaqtastyq jónindegi ýaǵdalastyqqa keldi.

Esterińizge sala keteıik, Qazaqstan Respýblıkasy men Serra-Leone Respýblıkasy arasyndaǵy dıplomatııalyq qatynastar 2014 jylǵy 20 qarashada ornatylǵan.

«Serra-Leoneden Qazaqstanǵa ımporttyń negizgi taýarlary: tıtan kenderi men kontsentrattary - 11,2 mln AQSh doll. (98,2% úlesimen), tsentrıfýgalar, suıyqtyqtardy nemese gazdardy súzýge arnalǵan jabdyqtar men qurylǵylar - 203,4 myń AQSh doll. (1,8%) bolyp tabylady»,-delingen habarlamada.

Foto: gov.kz