Qazaqstan AES qurylysy aıaqtalǵannan keıin onyń tolyqqandy ıesi bolady – mınıstr

ASTANA. KAZINFORM – Bolashaq atom elektr stantsııasynyń menshik ıesi, operatory, ýran shıkizatyn óndirýshisi jáne barlyq tehnologııalyq protsestiń ıesi Qazaqstan bolady. Bul týraly Atom energetıkasy agenttiginiń tóraǵasy málimdedi.

Almasadam Sátqalıev konkýrs arqyly irikteýdiń basty talaptarynyń biri stantsııanyń qazaqstandyq mamandar kúshimen táýelsiz ári tıimdi jumys isteýin qamtamasyz etý ekenin atap ótti. Osy maqsatta kadr daıarlaý júıesin, ındýstrııalyq-tehnıkalyq bazany qurý jáne qurylys jumystarynyń barlyq kezeńin barynsha jergiliktendirý kózdelip otyrǵanyn da tilge tıek etti. 

– Bul Qazaqstan ekonomıkasyna baǵyttalǵan iri ınvestıtsııalar ekenin túsinemiz. Jáne tolyq jaýapkershilikpen aıta alamyn: atom tehnologııalary boıynsha Reseıge táýeldilik táýekelderi óte tómen, is júzinde joq. Bul sharttar kelisimshartta naqty bekitilgen, - dedi ol.

Ózara is-qımyl formýlasy qarapaıym: «Keldi, saldy, oqytty – ketti». Sonymen qatar Qazaqstanda jylý bóletin jınaqtar (TVS) óndirisi jolǵa qoıylady. Elde ýran qory bar jáne otyn tabletkalaryn óndirý burynnan júrgizilip keledi. Buǵan qosa, Qazaqstan ýran konversııasyna arnalǵan kanadalyq kompanııalardyń lıtsenzııalaryna ıe jáne Reseı men Qytaı seriktesterimen yntymaqtastyq ornatqan.

– Jobany iske asyrý elimizde shıkizat óndirýden bastap ıadrolyq otyn shyǵarýǵa deıingi barlyq kezeńdi qamtıtyn tolyqqandy, óz-ózin qamtamasyz etetin atom klasterin qurýǵa múmkindik beredi. Bul – Memleket basshysynyń tapsyrmasyna sáıkes, atom energetıkasyn jáne ýran ónerkásibin damytýdyń basty maqsaty, - dedi Atom energetıkasy agenttiginiń tóraǵasy. 

Eske sala keteıik, buǵan deıin Qazaqstan ekinshi AES salatyn konsortsıýmnyń tizginin Qytaıǵa berýdi josparlap otyrǵanyn jazǵan edik.